Шахмат: Абдусатторов тантанали кутиб олинди
Бугун, 17 февраль эрта тонгда Германияда “Freestyle Chess” бўйича жаҳон чемпионатида муваффақиятга эришган ҳамюртимиз Нодирбек Абдусатторов Тошкент халқаро аэропортида тантанали равишда кутиб олинди.
Мукофот жамғармаси 300 минг АҚШ долларидан иборат мусобақада дунёнинг 8 нафар энг маҳоратли шахматчилари баҳс олиб борди.
Шиддатли кечган баҳслар якунида гроссмейстеримиз Нодирбек Абдусатторов германиялик Винсент Кеймерни 2.5:1.5 ҳисобида мағлуб этди ва жаҳон чемпионатининг бронза медали ва 40 минг АҚШ долларига эга чиқди.
Кутиб олиш маросимида иштирок этган Ўзбекистон шахмат федерацияси мутасаддилари, кенг жамоатчилик вакиллари ва кўплаб мухлислар жаҳон чемпионатида Абдусатторовнинг бронза медали билан бирга 2027 йилда ўтказиладиган навбатдаги жаҳон чемпионатига йўлланмани қўлга киритганини ўзбек шахматининг катта муваффақияти сифатида эътироф этди.
Т.Рўзиев, ЎзА