Нодирбек Абдусатторов блиц йўналишида 1-ўринни эгаллади
Хорватиянинг Загреб шаҳрида “SuperUnited Rapid & Blitz Croatia 2026” мусобақаси якунланди.
Мукофот жамғармаси 200 минг АҚШ долларидан иборат нуфузли турнирда ҳамюртимиз Нодирбек Абдусатторов, франциялик Алиреза Фирузжа ва Максим Вашье-Лаграв, ҳиндистонлик Рамешбабу Праггнанандха ва Доммаражу Гукеш, нидерландиялик Аниш Гири ва Жордан Ван Форест, германиялик Винсент Каймер, руминиялик Богдан-Даньел Дяк, хорватиялик Иван Сарич ғолиблик йўлида кураш олиб борди.
“Grand Chess Tour” тизимидаги “SuperUnited Rapid & Blitz Croatia 2026” мусобақасининг рапид йўналишида 12 очко жамғарган Алиреза Фирузжа 1-ўринни, ҳиндистонлик Рамешбабу Праггнанандха 12 очко билан қўшимча кўрсаткичларга кўра 2-ўринни ҳамда 11 очко жамғарган франциялик Максим Вашье-Лаграв 3-ўринни эгаллади.
Мусобақанинг 18 та турдан иборат блиц баҳсларида эса терма жамоамиз сардори Нодирбек Абдусатторов ўзига хос ўйин намойиш этиб, 12,5 очко жамғарган ҳолда Загреб турнирининг блиц йўналиши ғолибига айланди. Иккинчи ўрин 11,5 очко тўплаган Алиреза Фирузжага, 3-ўрин 10,5 очкога эга чиққан Максим Вашье-Лагравга тегишли бўлди.
“SuperUnited Rapid & Blitz Croatia 2026” мусобақаси сарҳисобига кўра, Нодирбек Абдусатторов ва Алиреза Фирузжа 24 очкога эгалик қилган ҳолда қўшимча тай-брек беллашувида рўбарў келди.
Тай-брекнинг биринчи ва иккинчи партияларида томонлар муроса йўлини танлагани боис мусобақа ғолиби армагеддон форматидаги баҳсда аниқланадиган бўлди.
Мазкур ўйин шаклида оқлар 5, қоралар 4 дақиқа вақт билан ҳаракатланиши белгиланган бўлиб, 61-юришдан бошлаб ҳар бир дона суришга 2 сониядан вақт қўшилиши белгиланган.
Ташланган қуръага биноан армагеддон форматининг илк ўйинида Алиреза Фирузжа қора доналарда дурангга эришиши ортидан “SuperUnited Rapid & Blitz Croatia 2026” ғолиблигини қўлга киритди ва 47 минг 500 АҚШ доллари билан тақдирланди.
Ўз навбатида, 2-ўринни эгаллаган Нодирбек Абдусатторов 42 минг 500 АҚШ доллари миқдоридаги мукофот пулини қўлга киритди.
Т.Рўзиев,
ЎзА
