“SuperUnited Rapid & Blitz Croatia 2026”: Нодирбек Абдусатторов рапид йўналишида 4-ўринни эгаллади
Хорватиянинг Загреб шаҳрида давом этаётган “SuperUnited Rapid & Blitz Croatia 2026” мусобақасининг рапид йўналишидаги мусобақалар якунланди.
Кеча ўтказилган 7-тур баҳсида Нодирбек Абдусатторов оқ доналарда амалдаги Жаҳон чемпиони Доммаражу Гукеш билан дурангга имзо чеккан бўлса, 8-турда оқ доналарда Алиреза Фирузжани, 9-турда қора доналарда хорватиялик Иван Сарични мағлуб этди.
Ушбу натижалардан кейин Нодирбек Абдусатторов рапид йўналишидаги 9 та тур ўйинларидан сўнг 10 очко билан қўшимча кўрсаткичларга кўра, 4-ўринни эгаллади.
Мукофот жамғармаси 200 минг АҚШ долларидан иборат “Grand Chess Tour” тизимидаги “SuperUnited Rapid & Blitz Croatia 2026” мусобақасининг рапид йўналишида 12 очко жамғарган Алиреза Фирузжа ва ҳиндистонлик Рамешбабу Праггнанандха ҳамда 11 очкога эга франциялик Максим Вашье-Лаграв совринли ўринларни банд этди.
Бугун, 4 июль куни турнирнинг блиц мусобақалари бўлиб ўтади.
Кун давомида 1-9-тур ўйинлари ташкил этилиб, турнирда қатнашаётган 10 нафар шахматчи ўзаро куч синашади. Блиц мусобақаларининг 10-18-тур ўйинлари эртага ўтказилади.
Т.Рўзиев, ЎзА
