Нодирбек Абдусатторов “SuperUnited Rapid & Blitz Croatia 2026” турнирида қатнашмоқда
Бугун, 1 июль куни Хорватиянинг Загреб шаҳрида “Grand Chess Tour” тизимида ўтказиладиган мусобақаларнинг учинчи босқичи ҳисобланган “SuperUnited Rapid & Blitz Croatia 2026” халқаро турнири бошланди.
Дунёнинг энг кучли 10 нафар шахматчиси иштирокида рапид ва блиц йўналишлари бўйича ташкил этилаётган турнирнинг умумий мукофот жамғармаси 200 минг АҚШ доллари этиб белгиланган бўлиб, унда ғолибликка эришган шахматчи 50 минг АҚШ доллари билан тақдирланади.
Турнирда ҳамюртимиз Нодирбек Абдусатторов 1-рақам остида таснифланган бўлса, маҳоратли шахматчимиз қаторида франциялик Алиреза Фирузжа ва Максим Ваше-Лаграв, ҳиндистонлик Рамешбабу Праггнанандха ва Доммаражу Гукеш, нидерландиялик Аниш Гири ва Жордан Ван Форест, германиялик Винсент Каймер, руминиялик Богдан-Даньел Дяк, хорватиялик Иван Сарич дона суриши белгиланган.
Бугун рапид йўналишида 3 та тур ўйинлари ташкил этилиши кўзда тутилган бўлиб, ушбу турларда Н.Абдусатторов Богдан-Даньел Дяк, Аниш Гири ва Винсент Каймер билан куч синашади.
Эслатиб ўтамиз, мусобақа низомига мувофиқ 9 та турдан иборат рапид мусобақалари 3 июлгача давом этса, 18 та турни қамраб олган блиц баҳслари 4-5 июль кунлари бўлиб ўтади.
Т.Рўзиев, ЎзА
