Ижтимоий реестрдаги оилаларга кўмир хариди учун 600 минг сўмгача компенсация берилади
2026 йил 30 июль куни “Кўмир саноатида бозор механизмлари жорий этилиши муносабати билан ижтимоий реестрга киритилган оилаларни қўллаб-қувватлаш чора-тадбирлари тўғрисида"ги Вазирлар Маҳкамаси қарори қабул қилинган.
Унга кўра, кўмир саноатида бозор механизмларини жорий этиш билан бир қаторда, ижтимоий реестрга киритилган оилаларни кўмир харид қилишда қўллаб-қувватлаш чоралари белгиланди.
Кўмир учун қанча миқдорда компенсация берилади?
Қарорга мувофиқ, ижтимоий реестрга киритилган оилаларга кўмир хариди учун давлат томонидан компенсация тўланади.
Бунда харид қилинган ҳар бир тонна кўмир учун 300 минг сўм миқдорида компенсация ажратилади. Бир оилага бир календарь йил давомида тўланадиган компенсациянинг умумий миқдори 600 минг сўмгача бўлади.
Компенсацияни олиш қандай тартибда амалга оширилади?
Компенсация олиш учун оила кўмирни mycoal.uz порталида рўйхатдан ўтган омбордан харид қилиши керак.
Харид жараёнида кўмирнинг миқдори ва уни қабул қилиб олиш факти mycoal.uz портали орқали тасдиқланади. Шундан сўнг харид қилинган кўмир миқдори асосида компенсация суммаси ҳисобланади.
Ҳисобланган маблағ ижтимоий карта ёки банк картасига ўтказиб берилади.
Шунинг учун компенсация олишда кўмир хариди ва уни қабул қилиб олиш факти электрон тизим орқали тасдиқланган бўлиши муҳим.
Тоғ-кон саноати ва геология вазирлиги ахборот хизматининг маълумотига кўра, мазкур тартиб асосида ижтимоий реестрга киритилган оилаларни кўмир хариди харажатларининг бир қисмини қоплаш асосида қўллаб-қувватлаш кўзда тутилган.
Компенсациянинг электрон тизим орқали ҳисобланиши ва картага ўтказиб берилиши жараённинг шаффоф ва манзилли амалга оширилишини таъминлайди.
Н.Зиёдуллаева,
ЎзА
