Нетаньяху ўрнига Айзенкот: Исроилда сиёсий бурилиш (+видео)
Исроил президенти Ицхак Герцог бўлиб ўтган парламент сайловидан сўнг янги ҳукуматни шакллантириш вазифасини амалдаги бош вазир Биньямин Нетаньяхуга эмас, балки мухолифат етакчиси Гади Айзенкотга топширди, деб хабар берди "ВВС" нашри.
– Сўнгги бир неча кун давомида турли расмий шахслар билан ўтказилган маслаҳатлашувдан кейин аён бўлди-ки, жаноб Айзенкот Кнессет аъзоларининг кўпчилиги томонидан аниқ ва бирдек қўллаб-қувватланмоқда, – деди Герцог ўз баёнотида.
Махсус маросимда Гади Айзенкот мамлакатга зудлик билан янги раҳбарият кераклигини таъкидлаб, тузилажак раҳбариятга исроилликларнинг аксари ишониши лозимлигига урғу берди.
– Бугун менга топширилган ваколат асосида миллий қутқарув ҳукуматини тузиш ишига раҳбарлик қиламан, – деди у. – Бунинг учун одатдагидан фарқли сиёсий қадамлар талаб этилади. Мазкур жараённи чўзиш ёки яна чексиз сайлов гирдобига қайтиш учун вақт ҳам, имконият ҳам йўқ.
Янги ҳукумат тузиш учун дастлаб Айзенкотга рухсат тегди. Гади вазифани уддалай олмаса, бошқа сиёсатчига имкон берилиши мумкин. Герцог бу қарор Айзенкотни шахсан афзал кўргани эмас, балки Нетаньяхуга нисбатан кўпроқ депутат қўллаб-қувватловига эга бўлгани учун қабул қилганини таъкидлаган.
Дарвоқе, вазият ҳали Нетаньяху бош вазирликдан кетганини англатмайди.
Кенжа Бекжонов,
Улуғбек Тўхтаев (видео),
ЎзА
