Нетаняҳунинг рақиби янги ҳукуматни тузади
Исроил президенти Исҳақ Герцог ўлкада ҳукумат тузиш ваколатини парламент сайловларида бош вазир Беньямин Нетаньяхунинг асосий рақиби бўлган мухолифат етакчиси Гади Айзенкотга топширди.
Айзенкот фавқулодда ҳукумат тузишини эълон қилди ва унга давлатнинг яҳудий табиатини сақлаб қолишни маъқуллайдиган, барча учун мажбурий ҳарбий хизматни қўллаб-қувватлайдиган ҳамда Ҳамасни террорчи ташкилот сифатида тан оладиган барча партияларни таклиф қилишини эълон қилди.
Жорий йил 27 октябрь куни Исроилнинг 120 ўринли парламентига (Кнессет) бўлиб ўтган сайловларда ғолиб аниқ бўлмади, яъни, ҳеч бир сиёсий блок 61 ўриннинг кўпчилигини қўлга кирита олмади.
Нетаньяхунинг “Ликуд” партияси бошчилигидаги ҳукмрон коалиция 53 ўринни, Айзенкотнинг мухолифат блоки эса 48 ўринни эгаллади. 19 ўринни банд этган Араб партиялари Айзенкот блокига қўшилгандан кейин биргаликда 67 ўринга эга бўлди.
Президент томонидан қўллаб-қувватланган номзод ҳукумат тузиш учун максимал 42 кунга эга бўлади. Агар номзодлик муваффақиятсиз бўлса, бу ҳуқуқ бошқа сиёсатчига ўтади, у буни амалга ошириш учун 28 кунга эга бўлади. Агар иккинчи уринишдан кейин ҳукумат тузилмаса, парламент кўпчилик бошқа номзодни тавсия қилиши мумкин бўлади. Бу жараён 21 кун давом этади. Шунда ҳам ушбу номзод муваффақиятга эриша олмаса, парламент тарқатиб юборилади ва янги сайловлар санаси белгиланади.
С.Раҳимов, ЎзА
