"Маҳалла"ни ЮНЕСКО Репрезентатив рўйхатига киритиш бўйича ишлар бошланди
Ўзбекистон Республикаси Президентининг «Маҳалла бошқарувини самарали ташкил этишга оид қўшимча чора-тадбирлар тўғрисида»ги фармони билан тасдиқланган "Йўл харитаси"га мувофиқ, “Маҳалла”ни ЮНЕСКО Номоддий маданий мероснинг Репрезентатив рўйхатига киритиш бўйича ишчи гуруҳнинг биринчи йиғилиши бўлиб ўтди.
Йиғилишни Ўзбекистон маҳаллалари уюшмаси раисининг биринчи ўринбосари Жовдатхон Иноғомов олиб борди. Мулоқот давомида ЮНЕСКО рўйхатига киритиш талаблари ҳамда маҳалла институтининг тарихий шаклланиши ва бугунги кундаги ижтимоий аҳамияти муҳокама қилинди.
Номинация ҳужжатлари маҳаллага хос урф-одатлар, маросимлар, ҳашар, ўзаро кўмак ва қўшничилик анъаналари асосида шакллантирилиши лозимлиги таъкидланди.
Шунингдек, ЮНЕСКО талабларига мувофиқ илмий концепция ишлаб чиқиш, тарихий ва этнографик материалларни тизимлаштириш, фото ва видеоматериалларни жамлаш, эксперт хулосалари ҳамда маҳаллий ҳамжамиятларнинг розилигини тасдиқловчи ҳужжатларни тайёрлаш бўйича келгуси вазифалар белгилаб олинди.
Н.Усмонова,
ЎзА
