Камилла Раҳимова бугун “Roland Garros”да ўйнайди
Франциянинг Париж шаҳрида теннис бўйича “Катта дубулға” туркумига кирувчи мукофот жамғармаси 61 миллион 723 минг еврони ташкил этувчи “Roland Garros” турнирида асосий тўр баҳсларининг биринчи давра баҳслари давом этмоқда.
Ушбу босқичнинг илк кунида Мирра Андреева (Россия), Юлия Стародубцева (Украина), Белинда Бенчич (Швейцария), Магда Линетт (Польша), Сорана Кирстя (Руминия) каби теннисчилар муваффақиятга эришган ҳолда иккинчи давра йўлланмасини қўлга киритди.
Биз учун аҳамиятлиси, Франция очиқ чемпионатининг бугунги дастурида мамлакатимизнинг биринчи рақамли теннисчиси Камилла Раҳимова илк баҳсини руминиялик теннисчи Жаклин Кристианга қарши ўтказади. Учрашув бугун, 25 май куни бўлиб ўтади. Мазкур тўқнашув мамлакатимиз вақти билан соат 18:30 дан сўнг старт олади.
Шунингдек, Камилла мусобақанинг жуфтлик беллашувларида чехиялик Анна Сискова билан тандемда биринчи даврада япониялик Макото Ниномия ва украиналик Надия Киченокка қарши кортга чиқади. Бу тўқнашув эртага, 26 май куни бўлиб ўтади.
Жавоҳир Тошхўжаев,
ЎзА
