Эрон мутахассислари АҚШнинг портламай қолган 14 тонналик бомбасини ўрганди
Ислом инқилоби қўриқчилари корпуси (ИИҚК) қўмондони катта маслаҳатчиси Муҳаммад Ризо Нағдийнинг сўзларига кўра, Эрон мамлакатнинг ядровий иншоотларига зарба берилганда ишлатилган АҚШнинг GBU-57 ўта оғир бункер бомбаси технологиясини топди.
Мулозим сўзларига кўра, 12 кунлик уруш давомида АҚШ Эронга қарши вазни тахминан 14 тонна келадиган ўқ-доридан фойдаланган. Эронлик мутахассисларда портламай қолган шундай аслаҳалардан бирининг ички қисмини кўздан кечириш имкони пайдо бўлди.
Ушбу бомба чуқур жойлашган, жуда кучли ҳимояланган ер ости иншоотини йўқ қилиш учун мўлжалланган экан.
Нағдий таъкидлашича, ўқ-дори яратишда ишлатиладиган технологияни ўрганиш якунланган. Бу борада Ислом Республикаси зарур техник тажрибага эга.
Вакил энди шунга ўхшаш технологиядан Америкага қарши фойдаланиш эҳтимоли мавжудлиги билан таҳдид қилган.
С.Раҳимов, ЎзА
