Давлат байроғи – мустақиллигимиз ва бирлигимиз рамзи
18 ноябрь – Ўзбекистон Республикаси Давлат байроғи қабул қилинган сана. Жиззах шаҳрида Давлат байроғи қабул қилинганининг 35 йиллиги муносабати билан ватанпарварлик тадбири ўтказилди. Унда ҳарбийлар ва ёшлар иштирокида “Ватанпарварлик карвони” ташкил этилди. Тадбир доирасида миллий гвардия чиқишлари ва расмлар танлови намойиш этилди.
Жиззах шаҳридаги Абу Али ибн Сино номидаги ихтисослаштирилган мактабда Ўзбекистон Республикаси Давлат байроғи қабул қилинганининг 35 йиллигига бағишланган ватанпарварлик тадбири бўлиб ўтди. Жиззахдаги тадбир ана шу маънавий масъулиятни ёш авлод онгига сингдиришга қаратилди.
1991 йил 18 ноябрь мамлакатимиз тарихида муҳим сана сифатида муҳрланган. Айнан шу куни Ўзбекистон Республикасининг Давлат байроғи тўғрисидаги қонун қабул қилинган. 407-XII-сонли ушбу ҳужжат миллий давлатчилигимизнинг муҳим ҳуқуқий асосларидан бирига айланган.
Қонуннинг 2-моддасида Давлат байроғи давлат суверенитетининг рамзи экани белгиланган. 3-модда эса унинг халқаро муносабатлардаги тимсолий мақомини мустаҳкамлаган. (Манба: Lex.uz).
Орадан 35 йил ўтаётган бўлса-да, байроғимизнинг қадри ва аҳамияти янада теран англанмоқда. У мустақил тараққиёт йўлимиз, тинчлигимиз ва миллий бирлигимизнинг ёрқин ифодасидир. Халқаро майдонда байроғимиз кўтарилганда, ҳар бир юртдошимиз қалбида ифтихор туйғуси жўш уради.
“Давлатимиз байроғи – миллий ғурур ва ифтихор тимсоли” шиори остидаги анжуман ёш авлод қалбида миллий қадриятларга ҳурмат туйғусини юксалтиришга хизмат қилди.
Тадбирда Ўзбекистон Ёшлар иттифоқи Жиззах вилояти Кенгаши иштирок этди. “Маҳалла” хайрия жамоат фонди ҳамкорлик қилди. Ҳарбий қисм, Миллий гвардия, Фавқулодда вазиятлар ва Божхона бошқармалари вакиллари қатнашди. Мактабнинг “Ватан таянчи” ҳаракати аъзолари ҳам фаол иштирок этди.
[gallery-32546]
Дастур доирасида “Ватанпарварлик карвони” ва “Ҳуқуқий тарбия соати” ташкил этилди. Ўқувчиларга Давлат байроғининг тарихи, рамзий маъноси ва ҳуқуқий мақоми тушунтирилди. Ёшлар ўртасидаги расм чизиш танловида эса Ватанга муҳаббат ижодий ишлар орқали ифодаланди. Ғолиблар диплом ва бадиий китоблар билан тақдирланди.
Ҳарбий оркестр ижросидаги Давлат мадҳияси садолари тадбирга ўзгача шукуҳ бағишлаб, иштирокчиларда миллий рамзларимизга нисбатан чексиз фахр туйғусини уйғотди.
Миллий гвардия ҳарбий хизматчиларининг қўл жанги чиқишлари ҳам намойиш этилди. Ҳарбийларнинг маҳорат ва жисмоний тайёргарлиги ёшларда катта таассурот қолдирди. Кўргазмада замонавий ҳарбий анжомлар ва қутқарув воситалари тақдим этилди. Масъуллар уларнинг вазифалари ҳамда хавфсизлик қоидалари ҳақида маълумот берди.
Албатта, Давлат байроғига ҳурмат фақат байрам тадбирларида намоён бўлмаслиги керак. Бу туйғу кундалик ҳаётимиздаги масъулият ва фидойиликда ҳам акс этиши зарур. Зеро, Ватан равнақига ҳисса қўшиш ҳам байроғимизга садоқат ифодасидир.
Мустақиллигимизнинг 35 йиллик тарихий рамзи бўлган Давлат байроғимиз барчамизни ягона мақсад атрофида бирлаштиради. Уни ардоқлаш, қадрлаш ва келажак авлодга ҳурмат руҳида етказиш ҳар биримизнинг бурчимиздир.
А. Қаюмов, Ж. Ёрбеков (сурат), ЎзА