"Тренд": Ўзбекистон ва Жанубий Африка кўмир саноатида ҳамкорликни кенгайтиради
Пойтахтимизда Ўзбекистон ва Жанубий Африканинг энергетика ҳамда кимё саноатига ихтисослашган “Sasol Limited” компанияси вакиллари ўртасида учрашув бўлиб ўтди.
Таъкидланишича, йиғинда Ўзбекистон Тоғ-кон саноати ва геология вазирининг биринчи ўринбосари Ф.Ҳамидова ва “Sasol” компаниясининг Яқин Шарқ ва Марказий Осиё бўйича вице-президенти Лоуренс Якобс бошчилигидаги делегация иштирок этган.
Учрашувда хомашёни чуқур қайта ишлашнинг илғор технологиялари соҳасида ҳамкорликни кенгайтириш, компаниянинг замонавий технологик ечимларини Ўзбекистонда жорий этиш имкониятлари муҳокама қилинди. Айниқса, мамлакатимиз кўмир саноатининг мавжуд салоҳияти ва ушбу йўналишда қўшма лойиҳаларни амалга ошириш истиқболларига алоҳида эътибор қаратилди.
Маълумот ўрнида: 1950 йилда ташкил этилган “Sasol” компаниясининг бош қароргоҳи Жанубий Африка Республикасининг Йоханнесбург шаҳрида жойлашган. Компания кўмир, табиий газ ва бошқа хомашё турларидан суюқ ёқилғи, кимёвий маҳсулотлар ҳамда энергетика соҳасида қўлланиладиган маҳсулотлар ишлаб чиқариш технологияларини яратиш ва тижоратлаштиришга ихтисослашган.
Таъкидлаш жоизки, “Sasol” компанияси Ўзбекистон билан технологик ҳамкорлик тажрибасига эга. Хусусан, ўлкамизда табиий газдан синтетик суюқ ёқилғи ишлаб чиқаришга қаратилган GTL лойиҳасида компаниянинг “Slurry Phase” технологиясидан фойдаланиш учун лицензия олинган.
Ф.Яхшибоева, ЎзА
