Россия армияси кенгаймоқда
Президент Владимир Путин армия таркибини яна 15 ярим минг ҳарбийга кўпайтириш тўғрисидаги фармонни имзолади. Бу йил давомидаги тўртинчи шундай қарор бўлиб, март ойидан бери Россия Қуролли кучлари белгиланган шахсий таркиби 47 860 кишига ошди.
Янги фармонга кўра, Қуролли кучлар умумий штат бирлиги 2 441 630, жумладан ҳарбий хизматчилар сони 1 550 500 нафарга етказилади. Ҳужжатда қарорнинг сабаби кўрсатилмаган. Мазкур қадам Россия ва Украина томонидан йўқотиш ортиб бораётган, фронтда эса Москва қўшини олдинга силжиши секинлашган пайтга тўғри келди. Дрондан кенг фойдаланилиши йирик ҳарбий гуруҳлар тез ҳаракатланишини қийинлаштирган, сўнгги ҳафталарда украин армияси фронтнинг айрим қисмларида олдинга силжигани ҳақида хабарлар тарқалган.
РФда сафарбарлик масаласи шу тариқа яна кун тартибига чиқди. РФ етакчиси сўнгги бор 2022 йил сентябрида фронтдаги қатор муваффақиятсизликдан кейин захира ҳарбийларини қисман сафарбар қилган ва ўша фармон ҳануз кучда. Киев разведкаси август ойида Москва томонидан жорий йил фронтга 300 000, келаси йил яна шунча одам жалб қилиш режалаштирилаётганини билдирган. Путин бундай хабарларни “бутунлай сафсата” деб атаган, Кремль армия эҳтиёжи шартнома асосида хизмат қилаётганлар ва кўнгиллилар ҳисобига қопланаётганини айтган. Зеленский эса янги фармонни шарҳлар экан, Россияда қўшимча сафарбарлик амалда бошланганини таъкидлаган.
Мусулмон Зиё, ЎзА
