Жиззах шаҳрида янги ўқув йилидан фаолият бошлаши режалаштирилган 5-олийгоҳ – Россия Федерациясининг Қозон Федерал университети филиалида пресс-тур ва матбуот анжумани ташкил этилди.

Иштирокчилар олийгоҳ учун ажратилган объектлар, жумладан, ўқув биноси ва ётоқхонада бажарилаётган капитал таъмирлаш ишлари билан яқиндан танишди.

– Филиал Президентимизнинг 2021 йил 28 августдаги “Жиззах шаҳридаги Қозон Федерал университети филиали фаолиятини ташкил этиш чора-тадбирлари тўғрисида”ги қарорига асосан ташкил этилмоқда, – дейди Қозон Федерал университети филиали ижрочи директори Озод Бобомуродов. – Собиқ олий авиация билим юртининг бир қисми, яъни 4,5 гектар майдони ва ундаги 5 та бино филиал учун ўтказиб берилди. Биноларни капитал таъмирлаш, реконструкция қилиш ва қурилиш ишлари жорий йил май ойидан бошланди.

Биринчи босқичда лойиҳа қиймати 13 миллиард 763 миллион сўмдан ортиқ бўлган ушбу объектда пудратчи – “Fayz Baraka Klassik” МЧЖ томонидан ишлар олиб борилмоқда. Биринчи босқичда барча қулайликларга эга ўқув биноси, маъмурий бино ҳамда 3 қаватли талабалар ётоқхонасидаги капитал таъмирлаш, реконструкция ва қурилиш ишлари якунланиши режалаштирилган.

Талабалар турар жойининг 1-қаватида Россия Федерациясининг Қозон Федерал университетидан Жиззахга келган ўқитувчи-профессорлар учун 6 та “vib” хона, кутубхона, фаоллар зали, 2- ва 3-қаватида эса талабалар учун 280 ўринли ётоқхона капитал таъмирдан чиқарилмоқда.

Бундан ташқари, 200 ўринли талабалар ошхонаси, спорт зали, ҳудуддаги ободонлаштириш-кўкаламзорлаштириш ишлари ҳам олиб борилмоқда.

– Илк ўқув йилида 330 нафар талаба қабул қилишни режалаштирганмиз, – дейди филиал иш бошқарувчиси Темур Асадов. – Имтиҳонлар ёзма ва оғзаки (билет шаклида) Қозон Федерал университетидан келган ўқитувчи-профессорлар томонидан амалга оширилади.

Қозон Федерал университетининг Жиззах шаҳридаги филиали халқаро стандартларга тўла жавоб берадиган замонавий таълим дастурлари асосида чуқур фундаментал ва илмий-амалий билимга эга юқори малакали кадрларни тайёрлаш, ҳудудий инновацион таълим тармоғини яратиш, рақамли таълим тизимини шакллантириш ҳамда иш берувчиларнинг олий маълумотли мутахассисларга бўлган эҳтиёжларини қондириш мақсадида ташкил этилмоқда.

Мамлакатимиздаги бошқа таълим муассасалари қабулига халал бермаслик, абитуриентларга қулай бўлиши учун қабул имтиҳонларининг биринчи босқичи июль, 2-босқичи сентябрь ойида бўлиб ўтади. Имтиҳонлар ҳам сабоқлар ҳам рус тилида олиб борилади.

Матбуот анжумани сўнгида журналистлар ўзларини қизиқтирган барча саволларга жавоблар олди.

[gallery-7546]

А.Қаюмов, Ж.Ёрбеков (сурат), ЎзА