Ўзбек каштачилиги Венецияда намойиш этилди
Венецияда ташкил этилган кўргазмада ҳунарманд Мадина Қосимбоева миллий сўзана санъатини жонли ижодий жараён орқали намойиш этди.
Мадина Қосимбоева республикамизнинг таниқли ҳунарманд аёлларидан бири бўлиб, анъанавий каштачиликни ривожлантиришга ҳисса қўшиб келмоқда. У 24 йилдан бери каштачилик билан шуғулланади ва "Шон-шараф" медали совриндори.
2007 йилдан бери Мадина Қосимбоева "Ҳунарманд" уюшмасининг аъзоси бўлиб, 2016 йилда Ўзбекистон рассомлар, санъатшунослар ва халқ ҳунармандлари уюшмасига аъзо бўлди.
Мадина Қосимбоеванинг ижодий асарлари нафақат Ўзбекистонда, балки Австралия, Буюк Британия, Германия, Ҳиндистон, АҚШ, Туркия, Франция ва МДҲ мамлакатларидаги шахсий коллекцияларда ҳам намойиш этилмоқда. 2023 йилдан бери рассом томонидан кашта қилинган иккита чопон Британия музейида доимий равишда намойиш этилмоқда.
Кўргазма давомида ташриф буюрувчилар каштанинг яратилиш жараёнини кузатиш, нақшларнинг нозик деталларини яқиндан кўриш ва анъанавий техника билан бевосита уста ижоди орқали танишиш имконига эга бўлди.
Гулноза Бобоева,ЎзА
