Вашингтонда ўзбек ҳунармандчилик санъати намойиш этилди

Ўзбекистон Республикасининг АҚШдаги элчихонасида “Нақш ибтидоси: Тўрт йўл: бир анъана” кўргазмасининг очилиши бўлиб ўтди.

Унда юртимиз уста-ҳунармандлари ва дизайнерлари ҳамда Амалий санъат ижодий уюшмаси вакиллари иштирок этди.

Экспозициядан ўзбек тўқимачилик санъатининг абр матоларини яратиш, бадиий каштачилик, зардўзлик ва замонавий либос дизайни йўналишларидаги ижод намуналари ўрин олди.

Шунингдек, кўргазмада марғилонлик абрбанд уста Расулжон Мирзааҳмедов, бадиий каштачилик устаси Мадина Қосимбоева, “Моэл” Бош бренди асосчиси Зуҳра Инат ҳамда “АНОР” бренди асосчиси Дилноза Умирзоқованинг ижодий ишлари намойиш этилди.

Кўргазма орқали ўзбек тўқимачилик меросининг бой анъаналари, миллий нақш ва рангларнинг бадиий имкониятлари ҳамда анъанавий ҳунармандчиликнинг замонавий ижоддаги талқини халқаро аудиторияга тақдим этилди.

Г.Бобоева, ЎзА