ИЭС тизимида муқобил энергия манбаларидан фойдаланиш қандай самара бермоқда?
Бугун Оммавий ахборот воситалари учун контент тайёрлаш марказида “Иссиқлик электр станциялари” АЖ Ишлаб чиқариш бош бошқармаси бошлиғи Ғолиб Салимёров иштирокида жамият тизимида муқобил энергия манбаларини жорий этиш ва энергия ресурсларини тежаш борасида амалга оширилаётган ишлар юзасидан брифинг ўтказилди.
Таъкидланганидек, жамият тизимида қайта тикланувчи энергия манбаларидан самарали фойдаланиш, электр энергияси истеъмолини камайтириш ҳамда табиий газ ресурсларини тежашга қаратилган чора-тадбирлар изчил амалга оширилмоқда.
Хусусан, тизимда умумий қуввати 15,9 мегаватт бўлган қуёш фотоэлектр станциялари қурилиб, фойдаланишга топширилган. 2026 йилнинг январь-сентябрь ойларида ушбу станциялар орқали 14,6 миллион киловатт-соат электр энергияси ишлаб чиқарилиб, 3,7 миллион куб метр табиий газ тежалди.
Шунингдек, корхоналарда энергия самарадорлигини ошириш мақсадида 1 520 дона автоном қуёш чироғи, 1 783 дона ҳаракат датчиги ҳамда электр двигателларига 181 дона частота ўзгартиргич ўрнатилди. Амалга оширилган ушбу чора-тадбирлар натижасида 2026 йилнинг январь–сентябрь ойларида қўшимча 13,2 миллион киловатт-соат электр энергияси тежалиб, 3,3 миллион куб метр табиий газ иқтисод қилинди.
Бундан ташқари, жамият тизимида қуёш сув иситиш қурилмаларини маҳаллий шароитда йиғиш ишлари ҳам йўлга қўйилган. Айни вақтда корхоналарда ҳар бирининг сиғими 200 литр бўлган 117 та қуёш сув иситкичи ишлаб турибди. Мазкур қурилмалардан фойдаланиш энергия ресурсларини тежаш ва маҳаллийлаштириш жараёнларини ривожлантиришга хизмат қилмоқда.
Брифингда Ғолиб Салимёров таъкидлаганидек, жорий йилнинг дастлабки тўққиз ойида қуёш фотоэлектр станцияларида электр энергияси ишлаб чиқариш ва энергия тежамкор чора-тадбирларини амалга ошириш натижасида жами қарийб 28 миллион киловатт-соат электр энергияси ишлаб чиқарилди ва тежалди. Бунинг ҳисобига 7 миллион куб метр табиий газ иқтисод қилинди.
–Эришилаётган натижалар нафақат энергия ресурсларини тежаш ва иқтисодий самарадорликни ошириш, балки атроф-муҳитга салбий таъсирни камайтиришда ҳам муҳим аҳамиятга эга. Келгусида ҳам қуёш энергиясидан фойдаланиш кўламини кенгайтириш, замонавий энергия тежовчи технологияларни жорий этиш ва корхоналарнинг ички эҳтиёжлари учун сарфланадиган энергия миқдорини камайтириш бўйича ишларни изчил давом эттирамиз, – деди Ғ. Салимёров.
Қайд этилганидек, табиий газ сарфининг камайтирилиши атмосферага чиқариладиган карбонат ангидрид миқдорини қисқартиришга ҳам хизмат қилмоқда. Умуман, муқобил энергия манбаларини жорий этиш ва энергия самарадорлигини оширишга қаратилган чора-тадбирлар жамият тизимида ресурслардан оқилона фойдаланиш, ишлаб чиқариш самарадорлигини ошириш ва экологик барқарорликни таъминлашда муҳим аҳамият касб этмоқда.
Насиба Зиёдуллаева, ЎзА
