Ҳурмуздаги кескинлик нефть нархини яна кескин оширди
АҚШ ва Эрон ўртасидаги янги ҳарбий зарбалар жаҳон нефть бозорига дарҳол таъсир қилди. Таъкидланишича, “Brent” русумидаги нефть нархи 3,5 фоизга ошиб, бир баррел учун 78,68 долларга, “WTI” нефти эса 73,89 долларга етди. Глобал бозор иштирокчилари Ҳурмуз бўғози орқали нефть ташиш яна издан чиқишидан хавотир билдирмоқда.
Таҳлилчиларга кўра, кема қатнови сезиларли даражада секинлашган. Ҳафта охирида Эрон АҚШнинг Форс кўрфазидаги ҳарбий объектларига зарба берганини, шунингдек бўғозни яна ёпганини маълум қилди.
Маълумки, Ҳурмуз бўғози — Форс кўрфазини Ўмон кўрфази билан боғлайдиган стратегик денгиз йўли бўлиб, у орқали жаҳонда экспорт қилинадиган нефть ва суюлтирилган табиий газнинг қарийб бешдан бир қисми ташилади.
Кемалар ҳаракатини кузатувчи “Kpler” компанияси маълумотига кўра, якшанба куни бўғоз орқали атига олтита кема ўтган. Бу сўнгги беш ҳафтадаги энг паст кўрсаткич ҳисобланади. Мутахассислар вазиятнинг кескинлашиши ўтган ой АҚШ ва Эрон ўртасида эришилган вақтинчалик келишув тақдирини ҳам сўроқ остига қўяётганини таъкидламоқда.
Шу билан бирга, “Goldman Sachs” инвестиция банки Яқин Шарқда қувур тармоқларини кенгайтириш орқали 2028 йилга бориб Ҳурмуз бўғозига қарамликни сезиларли камайтириш мумкинлигини билдирди. Ҳозирча ҳар қандай ҳарбий кескинлик жаҳон энергия бозорида нархларнинг тез ўзгаришига сабаб бўлаётгани қайд этилмоқда.
Мусулмон Зиё, ЎзА
