Самарқандда қизғин курашлар остида ўтган “Grand Swiss-2025” турнирининг ғолиб ва совриндорлари, 2026 йилги жаҳон чемпионати номзодлар мусобақасида иштирок этиш ҳуқуқига эга чиққан шахматчилар номи аниқланди.

Деярли икки ҳафта мобайнида дунё шахмат ишқибозлари, мутахассислари эътиборини Ўзбекистонга қаратган мусобақалар ҳар жиҳатдан юқори савияда ўтгани, унда кутилмаган натижалар қайд этилгани билан “Grand Swiss-2025” халқаро шахмат оламида янги тарих яратди.

Эркаклар мусобақасида 11 имкониятдан 8,5 очко жамғарган нидерландиялик Аниш Гири ғолибликни тантана қилган бўлса, ундан ярим очко ортда қолган германиялик Маттиас Блюбаумга 2-ўрин насиб этди.

Мамлакатимиз шахматчиларидан Нодирбек Абдусатторов ва Нодирбек Ёқуббоев 7 очко билан 116 нафар иштирокчи орасида қўшимча кўрсаткичларга кўра 10 ва 14-ўринлардан жой эгаллади.

[gallery-25327]

Аёллар мусобақасида 8 очкодан жамғарган ҳиндистонлик Вайшали Рамешбабу ва ФИДЕ байроғи остида турнирда қатнашган Катерина Лагно совринли ўринлар билан бир қаторда номзодлар турнирида қатнашиш ҳуқуқига эга чиқди.

Самарқандда шиддатли ва муросасиз кечган мусобақаларда амалдаги жаҳон чемпиони Доммаражу Гукеш, турнирнинг биринчи рақамли иштирокчиси Рамешбабу Праггнанандха, ФИДЕ рейтингида 4-ўрин соҳиби Ян Непомняший каби бир қатор кучли шахматчилар 6 очко билан 40-50-поғоналардан жой олгани ҳар бир турдаги баҳслар нечоғли мураккаб ўтгани, шахматчиларнинг билим даражаси йилдан йилга юксалаётганини кўрсатди.

Тақдирлаш маросимида иштирок этган Ўзбекистон ёшлар ишлари агентлиги бош директори, мамлакат шахмат федерацияси раисининг биринчи ўринбосари А.Саъдуллаев, Самарқанд вилояти ҳокими А.Бобоев ва бошқалар “Grand Swiss-2025”нинг ғолиб ва совриндорларига тегишли даражадаги мукофотларни топширди.

Шунингдек, 2026 йилги жаҳон чемпионати номзодлар мусобақасида қатнашиш ҳуқуқини қўлга киритган Гири, Блюбаум, Вайшали ва Лагнони қизғин табриклаб, тегишли сертификатларни тақдим этишди.

<iframe width="650" height="420" src="https://www.youtube.com/embed/xQmlf9X_sZU" title="“Grand Swiss-2025”: Samarqandda jahon shaxmatining yangi tarixi yaratildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тўлқин Рўзиев,

Алишер Исроилов (сурат, видео), ЎзА