АҚШда ёқилғи нархининг қимматлаши Оқ уйга босимни кучайтирмоқда
Эрон можароси чўзилиб бораётган бир пайтда Қўшма Штатларда ёқилғи нархининг кескин ошиши президент маъмурияти учун янги сиёсий ва иқтисодий муаммоларни юзага келтирмоқда.
“Reuters” нашри ёзишича, Оқ уй ҳозир ёқилғи нархини пасайтириш бўйича чекланган имкониятга эга бўлиб қолган. Маълум қилинишича, Дональд Трамп маъмурияти федерал бензин солиғини вақтинча бекор қилиш масаласини кўриб чиқмоқда.
Шунингдек, АҚШ нефть бозоридаги вазиятни диққат билан кузатмоқда. Хусусан, Ҳурмуз бўғози атрофидаги кескинлик туфайли жаҳон нефть таъминотида узилиш хавфи ортиб бормоқда. Бу йўлак орқали дунё нефтининг қарийб бешдан бири ташилади.
Президент Трамп журналистлар билан мулоқотда Эрон ядровий қуролга эга бўлмаслиги керак, дея баёнот берган. АҚШ Энергетика вазирлиги ички бозордаги босимни юмшатиш мақсадида стратегик нефть захираларидан қўшимча 53,3 миллион баррель нефть ажратилишини маълум қилди.
Д.Ҳакимов, ЎзА
