Агробанк Жиззах вилоятининг Ғаллаорол туманидаги "Agro In Vitro" лойиҳаси билан яқиндан таништириш мақсадида оммавий ахборот воситалари ва соҳа вакиллари учун пресс-тур ташкил этди.

Давлатимиз раҳбарининг 2023 йил 3 августдаги ПҚ-260-сон қарори асосида ташкил этилган ушбу лойиҳа 2024 йил май ойидан бошлаб фаолиятини йўлга қўйган. Лаборатория, иссиқхона, кўчатзор ва оналик боғини ўз ичига олган инновацион комплекс умумий 20,4 гектар майдонга эга. Лойиҳанинг амалга оширилиши учун жами 20 миллион АҚШ доллари миқдорида инвестиция йўналтирилган.

“Agro In Vitro”да 72 нафар маҳаллий мутахассис иш билан таъминланган. Улар орасида 1 нафар PhD даражасига эга олим, 6 нафар магистр, 9 нафар биотехнолог-агроном ва 24 нафар лаборант бор.

Бу ерда дунёнинг энг илғор технологиялари жорий қилинган. Жумладан, VISCON GROUP (Нидерландия) томонидан МДҲда ягона бўлган in-vitro лабораторияси, Gakon Netafim (Нидерландия) томонидан эса дунёда бешинчи ўринда турувчи юқори технологияли иссиқхона ишга туширилган.

[gallery-24098]

Шунингдек, Италиянинг Battistini Vivai, Vitroplant, шунингдек Испаниянинг Viveros Proveda ва АҚШнинг Foundation Plant Services компаниялари билан мустаҳкам ҳамкорлик ўрнатилган.

Ҳамкорлик доирасида данакли меваларнинг 35 тури, уруғли меваларнинг 25 тури, манзарали ўсимликларнинг 30 тури, узумнинг 11 нави, пайвандтагларнинг 30 тури ҳамда резавор меваларнинг 18 хил нави олиб келиниб, улар асосида кафолатланган, юқори сифатли кўчатлар етиштириш жараёни йўлга қўйилган.

Уй шароитида етиштирилган кўчатлардан in-vitro усулида етиштирилган кўчатларнинг асосий афзалликлари шундаки, улар вирус ва турли касалликлардан холи, генетик ва сифат жиҳатдан бир хил бўлади. Ҳосилдорлик ҳам 40 фоизгача юқори. Бундан ташқари, лабораторияда ҳар хил синовлардан ўтказилган кўчатларни йил давомида очиқ майдонга экиш мумкин.

Маълум қилинишича, жорий йил якунигача 1,1 миллион дона кўчат сотувга чиқарилиши режалаштирилган. Айни пайтда agroinvitro.uz платформасида харидорларга ҳудуд ва иқлим шароитига мос кўчатларни тавсия қилувчи тизим ишлаб чиқилмоқда. 

Маҳаллий агроном ва кўчатчилар учун ҳар йили икки маротаба бепул 3 кунлик ўқув курслари ташкил этилади. Бу ҳақдаги эълонлар @agro_in_vitro Telegram каналида жойлаштирилади.

“Agro In Vitro” ўз олдига катта мақсадлар қўйган. Жумладан, ходимларнинг малакасини ошириш, пайвандлашнинг янги усулларини жорий этиш, шунингдек, Италия давлатидан эртапишар, кечпишар ва ўзини ўзи чанглатадиган навларни олиб келиш режалаштирилмоқда. Бундан ташқари, сувсизликка чидамли ва юқори ҳосилдорликка эга бўлган навларни кўпайтириш ишлари йўлга қўйилади. Режага биноан, 2026 йилда 2 миллион, 2027 йилда 5 миллион, 2030 йилга келиб эса 10 миллион дона кўчат ишлаб чиқарилиши кўзда тутилган.

Ҳозирги кунда бутун дунёда ҳосилдорликни ошириш ва озиқ-овқат хавфсизлигини таъминлаш устувор вазифалардан бирига айланган. Шу нуқтаи назардан, Агробанк томонидан тақдим этилган “Agro In Vitro” лойиҳаси — маҳаллий агросаноатни ривожлантириш, кўчатлар импортини қисқартириш ҳамда юқори самарадорликка эга маҳаллий мевали дарахтлар ҳамда узум навларини кенг оммалаштиришда муҳим босқич ҳисобланади.

Умиджон Қурбонов,

Носир Ҳайдаров (сурат),

ЎзА