Алматыдағы көрмеде өзбекстандық суретшілердің туындылары таныстырылды
Өзбекстан мен Қазақстан арасындағы тату көршілік пен стратегиялық серіктестік жыл өткен сайын жаңа мазмұнмен толығып келеді. Екі ел арасындағы экономикалық және саяси байланыстармен қатар, мәдени-гуманитарлық ынтымақтастық та қарқынды дамып, халықтарды жақындастыратын ортақ жобалар көбейіп келеді.
Өнер – осы байланыстың ең әсерлі әрі әмбебап тілдерінің бірі. Өйткені қылқалам туындысы арқылы халықтың тарихын, дүниетанымын, ұлттық болмысын және бүгінгі тынысын сөзсіз-ақ жеткізуге болады. Осындай шығармашылық үндестіктің кезекті көрінісі Алматы қаласында ұйымдастырылған халықаралық көрмеде көрініс тапты.
Алматы қаласы музейлер бірлестігінің галереясында «Реализмнен заманауи көркемдік тәжірибелерге дейін» атты халықаралық көрме өтті. Көрме Өзбекстанның Алматыдағы Бас консулдығы, «ТҮРКСОЙ» халықаралық ұйымы, Өзбекстан Көркемөнер академиясы және Қазақстан Суретшілер одағының бірлескен ұйымдастыруымен өткізілді.
Көрмеге Өзбекстанның әр өңірінен келген суретшілер қатысып, өздерінің шығармашылық ізденістерін қазақстандық көрерменге ұсынды. Экспозицияға Ташкент, Самарқанд, Бұхара, Ферғана, Қоқан, Әндіжан, Жызақ, Нөкіс, Ангрен, Бекабад және Өзбекстанның басқа да өңірлерінен келген 40 автордың 63 туындысы енгізілді.
Экспозицияның ерекшелігі – онда өзбек бейнелеу өнерінің бір ғана бағыты емес, оның әр кезеңі мен түрлі көркемдік ізденістері қамтылды. Классикалық реализмге негізделген туындылармен қатар, заманауи өнердің жаңа формалары мен авторлық шешімдерін көрсететін шығармалар да көрермен назарына ұсынылды. Осы арқылы көрме Өзбекстан бейнелеу өнерінің дәстүр мен жаңашылдықты қатар алып келе жатқанын аңғартты.
Көрмеде ұсынылған жұмыстардың географиялық ауқымының кең болуы да назар аудартады. Ташкенттің заманауи қалалық келбетінен бастап, Самарқанд пен Бұхараның тарихи атмосферасына, Ферғана аңғары мен Қарақалпақстанның өзіндік мәдени болмысына дейінгі алуан тақырыптар өзбек өнерінің өңірлік ерекшеліктерін танытуға мүмкіндік берді.
Мұндай мәдени іс-шаралар шығармашылық адамдардың өзара тәжірибе алмасуына да жол ашады. Қазақстандық және өзбекстандық суретшілердің бір кеңістікте бас қосуы жаңа көркемдік байланыстардың қалыптасуына, бірлескен жобалардың дүниеге келуіне және екі елдің өнер әлеміндегі өзара ықпалдастықтың артуына ықпал етеді.
Көрме сонымен бірге Алматы тұрғындары мен қала қонақтарына Өзбекстанның қазіргі өнер кеңістігімен жақынырақ танысуға мүмкіндік берді. Өнер туындылары арқылы көрермендер көрші елдің дәстүрі мен мәдениетін ғана емес, оның қазіргі қоғамының тынысын да сезіне алды.
Бұл бастама екі халықтың бай мәдени мұрасы мен заманауи шығармашылық әлеуетін өзара танытуға, жаңа шығармашылық жобаларға негіз қалауға және Қазақстан мен Өзбекстан арасындағы достық әрі мәдени байланыстарды одан әрі нығайтуға маңызды үлес қосты.
