Өзбекстанның Қазақстандағы елшісі Бахтиёр Ибрагимовтың Алматы қаласына жасаған жұмыс сапары аясында екіжақты ынтымақтастықты одан әрі кеңейтуге бағытталған бірқатар кездесулер өтті.
«Dunyo» ақпарат агенттігінің хабарлауынша, кездесулерге Алматы қаласы әкімдігінің өкілдері, тиісті мекемелер, іскерлік орта және сарапшылар қатысты.
«Алматы қаласының әкімі Дархан Сатыбалдымен өткен кездесуде Өзбекстан мен Қазақстан арасындағы қарым-қатынастардың қарқынды дамып келе жатқаны атап өтілді. Тараптар өңіраралық ынтымақтастықты тереңдету және бірлескен жобаларды жүзеге асыру мәселелері бойынша пікір алмасты», делінген хабарламада.
Дархан Сатыбалды Өзбекстанмен әріптестіктің жоғары қарқынын ерекше атап өтіп, 2025 жылғы қараша айында Қазақстан Президенті Қасым-Жомарт Тоқаевтың Өзбекстанға мемлекеттік сапары, сондай-ақ 2025 жылғы наурыз айында Өзбекстан Президенті Шавкат Мирзиёевтің Алматы қаласына жасаған жұмыс сапары екі ел өңірлері арасындағы байланыстарды айтарлықтай жандандыра түскенін айтқан.
Мәліметтерге сәйкес, биылғы жылдың 9 айының қорытындысы бойынша Алматы мен Өзбекстан өңірлері арасындағы тауар айналымы 20 пайызға өсіп, 850 миллион АҚШ долларынан асты. Бұл көрсеткіш екі ел арасындағы жалпы сауданың шамамен бестен бір бөлігін құрайды. Сонымен қатар, Алматы қаласында Өзбекстан капиталының қатысуымен жұмыс істейтін кәсіпорындар саны 4 мыңға жеткен.
Кездесу барысында туризм әлеуетін тиімді пайдалану мақсатында әуе қатынастарын көбейту, бірлескен таныстырылым шараларына ұлттық стендтермен қатысу, сауда көлемін кезең-кезеңімен арттыру, бизнес-миссиялар ұйымдастыру, сондай-ақ өнеркәсіптік кооперация аясында инновациялық бағыттар бойынша бірлескен өндірістерді іске қосу мәселелері талқыланды.
Сондай-ақ дипломаттар «Олимп» компаниясының басқаруындағы Алматы өңірлік диагностикалық орталығының қызметімен танысты. Онда денсаулық сақтау саласындағы жекеменшік басқару мен тиімді менеджмент тәжірибесіне ерекше назар аударылды.
Бұдан бөлек, «KazWaste» қауымдастығының басшылығымен кездесу өтіп, тұрмыстық және өндірістік қалдықтарды басқару тиімділігін арттыру, мамандардың әлеуетін күшейту, озық тәжірибе алмасу және өңірлік экологиялық жобаларды қалыптастыру мәселелері қаралды.
Кездесу барысында 2026 жылғы сәуір айында Астана қаласында өтетін өңірлік экологиялық іс-шаралар аясында қалдықтарды басқару тақырыбында практикалық диалог алаңдарын ұйымдастыру ұсынысы айтылды.
Кездесулер қорытындысында тараптар екі елдің өкілетті құрылымдары арасында тікелей байланыстар орнату, ынтымақтастық туралы меморандум дайындау және халықаралық қаржы көздері есебінен бірлескен бастамаларды ілгерілету жөнінде келісімге келген.