"Jizzax Grand Prix": Ўзбекистонлик велоспортчилар шоҳсупада
Жиззах вилоятининг Зомин туманида велоспортнинг шоссе йўналиши бўйича халқаро "Jizzax Grand Prix" мусобақаси бўлиб ўтмоқда.
Халқаро велосипедчилар иттифоқи (UCI) тақвимидан ўрин олган нуфузли турнирда 10 дан ортиқ давлатдан келган профессионал спортчилар қимматли рейтинг очколари учун баҳс олиб бормоқда.
Мусобақанинг биринчи куни дастуридан ўрин олган аёллар ўртасидаги яккалик пойгаси ғолиб ва совриндорлари номи маълум бўлди. 92 километр масофада ўтказилган баҳсда ўзбекистонлик спортчилар юқори натижа қайд этиб, шоҳсупанинг барча поғоналарини банд этди.
Якуний натижаларга кўра, Ўзбекистон миллий терма жамоаси аъзоси Янина Кускова биринчи бўлиб марра чизиғини кесиб ўтди ва олтин медалга сазовор бўлди. "7SABER Uzbekistan Women Cycling Team" жамоаси вакили Шаҳноза Абдуллаева иккинчи ўринни эгаллаган бўлса, Ўзбекистон миллий терма жамоаси спортчиси Мадина Қаҳҳорова бронза медалини қўлга киритди.
Шу тариқа мусобақанинг илк куни ўзбекистонлик велоспортчиларнинг устунлигида ўтди.
Жавоҳир Тошхўжаев, ЎзА
