Бугун Синдоров Карлсен билан, Абдусатторов Уэсли билан курашади
Гонгконгда шахматнинг рапид ва блиц йўналишлари бўйича жамоалар ўртасида жаҳон чемпионати ўтказилмоқда. Рапид мусобақаларининг 8-тури ортда қолган вазиятда Нодирбек Абдусатторов, Жавоҳир Синдоров етакчилигидаги “Ўзбекистон” жамоаси 10 очко билан қўшимча кўрсаткичларга кўра, 48 та жамоа орасида 11-ўринни эгаллаб турибди.
Магнус Карлсен, Аржун Эригаиси, Уэсли Со, Алиреза Фирузжа, Фабиано Каруана, Ричард Раппорт сингари дунёнинг энг кучли гроссмейстерларини жамлаган 48 та жамоанинг 300 нафардан зиёд шахматчиси иштирокида ўтаётган ФИДЕ тизимидаги мазкур жаҳон чемпионатида “Ўзбекистон” жамоаси ўтказилган 8 та турнинг 5 тасида ғалаба, 2 тасида мағлубият қайд этган ҳолда совринли ўринларга даъвогарлик қилмоқда.
Бугун, 19 июнь куни чемпионат дастурига мувофиқ, рапид йўналишидаги мусобақаларнинг 9-12-тур баҳслари бўлиб ўтади.
Қуръа натижасига кўра, ҳамюртларимиз ушбу турда Магнус Карлсен етакчилигидаги “WR Chess” жамоаси билан куч синашади. Ушбу ўйинда Жавоҳир Синдоров 1-тахтада Карлсен қаршилигини енгишга ҳаракат қилса, Нодирбек Абдусатторов Уэсли Со билан, Нодирбек Ёқуббоев Каруана билан баҳс олиб боради.
Шунингдек, чемпионатда маҳоратли шахматчиларимиз Гулруҳбегим Тоҳиржонова ва Муҳаммадзоҳид Суяров жой олган “Sky Chess” жамоаси бугун Садхва Раунак етакчилигидаги “”Chessnut Nova” жамоаси билан рўбарў келади.
Ҳозирда чемпионат жадвалини 14 очко билан Хитойнинг “Dragon Chilling” жамоаси бошқариб турибди. Кейинги ўринларни Аржун Эригаиси сардорлигидаги “Team MGD1” (13,), Дмитрий Андрейкин етакчилигидаги “Barys”(12) эгаллаган.
Бугун мукофот жамғармаси 500 минг евродан иборат жаҳон чемпионатининг рапид баҳсларида ғолиб ва совриндорлар аниқланса, 20-21 июнь кунлари блиц йўналишидаги мусобақалар бўлиб ўтади.
Т. Рўзиев,
ЎзА
