Vatan tayanchi — ertangi kun ishonchi
Vatanga muhabbat — qalbdagi eng ulug‘ tuyg‘u, yurt taqdiriga daxldorlik esa har bir fuqaroning ma’naviy burchidir. Bu tuyg‘ular yosh avlod qalbida qanchalik erta shakllansa, uning kelajakdagi hayot yo‘li, fuqarolik pozitsiyasi va jamiyat oldidagi mas’uliyati shunchalik mustahkam bo‘ladi. Zero, Vatanni sevish faqat uning go‘zalligidan faxrlanish emas, balki uning tinchligi, osoyishtaligi va taraqqiyoti uchun mas’uliyatni his etish, zarur paytda yurt manfaatlarini himoya qilishga tayyor turishdir.
Bugun mamlakatimizda yoshlarni vatanparvarlik, milliy qadriyatlarga hurmat, mardlik va fidoyilik ruhida tarbiyalashga alohida e’tibor qaratilayotgani bejiz emas. Prezident Shavkat Mirziyoyev tashabbusi bilan yoshlarni har tomonlama qo‘llab-quvvatlash, ularning ma’naviy dunyoqarashini boyitish, jismoniy va intellektual salohiyatini rivojlantirish, Vatan taqdiriga daxldorlik tuyg‘usini kuchaytirishga qaratilgan ishlar izchil davom etmoqda. Bu jarayonda harbiy-vatanparvarlik tarbiyasi yoshlarning nafaqat bugungi kamoloti, balki ertangi kunga tayyorgarligida ham muhim ahamiyat kasb etadi. Ana shunday ezgu maqsadlar yo‘lida Buxoro shahridagi umumta’lim maktablarining 10–11-sinf o‘quvchilari ishtirokida “Vatan tayanchi” bolalar va o‘smirlar harbiy-vatanparvarlik harakati otryadi a’zolik guvohnomalari va emblemalarini topshirish marosimi tashkil etildi.
Shaharda joylashgan harbiy qismda o‘tkazilgan tadbir viloyat Mudofaa ishlari boshqarmasi, harbiy prokuratura hamda O‘zbekiston yoshlar ittifoqi Buxoro viloyati Kengashi hamkorligida tashkil etildi. Unda faxriylar va jamoatchilik kengashi a’zolari ham ishtirok etishib, yosh avlodni Vatanga sadoqat ruhida tarbiyalash, ularning qalbida milliy g‘urur va yuksak mas’uliyat tuyg‘ularini mustahkamlash masalalariga e’tibor qaratildi.
Tantanali marosimning ahamiyati faqat o‘quvchilarga a’zolik guvohnomasi va emblemalar topshirilgani bilan cheklanmaydi. Uning zamirida yoshlarga bildirilgan ishonch, ular zimmasiga yuklanayotgan mas’uliyat va kelajakka qaratilgan ezgu maqsadlar mujassam.
Chunki guvohnoma — shunchaki hujjat, emblema esa oddiy belgi emas. Ular yoshlar uchun Vatan oldidagi burchni anglash, o‘z xatti-harakatlariga mas’uliyat bilan yondashish, intizomli bo‘lish va tengdoshlariga namuna ko‘rsatishga undaydigan ma’naviy ramz sifatida ahamiyat kasb etadi.
Har qanday jamiyatning ertangi taraqqiyoti bugun qanday avlod voyaga yetayotganiga bog‘liq. Bilimli, tashabbuskor va mustaqil fikrlaydigan yoshlar bilan birga, yurtiga sadoqatli, burchini teran anglaydigan, qiyinchiliklar oldida matonat ko‘rsata oladigan avlodni tarbiyalash ham muhim vazifadir.
Bu borada davlat idoralari, ta’lim muassasalari, mahalla, ota-onalar va keng jamoatchilikning hamkorligi alohida o‘rin tutadi. Zero, vatanparvarlik tarbiyasi bir kunlik tadbir yoki muayyan sana bilan cheklanmaydi. U oiladagi tarbiyadan boshlanib, maktabdagi ta’lim, jamoatchilik muhiti va hayotiy tajriba orqali mustahkamlanib boradi.
Shuning uchun ham harakat a’zolarining keyingi faoliyatini mazmunli tashkil etish, ularni ma’rifiy uchrashuvlar, sport musobaqalari, harbiy-amaliy mashg‘ulotlar, tarixiy qadamjolarga sayohatlar va ijtimoiy loyihalarga jalb etish muhimdir. Bunday ishlar yoshlarning nazariy bilimlarini hayotiy ko‘nikmalar bilan boyitib, ularda tashabbuskorlik va jamoa bilan ishlash qobiliyatini rivojlantiradi. Zero, harbiy-vatanparvarlik tarbiyasining samarasi tadbirdagi ishtirokchilar soni yoki topshirilgan guvohnomalar bilangina emas, balki yoshlarning kundalik hayotida qanday ijobiy o‘zgarishlar yuz berayotgani, ularning bilim olishga intilishi, intizomi va jamiyat hayotidagi faolligi bilan ham belgilanadi.
Tantanali marosimda a’zolik guvohnomalari va emblemalarni qabul qilib olgan o‘quvchilar endi o‘z oldilariga yanada yuksak maqsadlar qo‘yish, bilim va iqtidorlarini rivojlantirish, tengdoshlari orasida ibrat ko‘rsatishga intilishlari lozim. Chunki ularga bildirilgan ishonchni oqlashning eng to‘g‘ri yo‘li — yaxshi o‘qish, odobli bo‘lish, jamiyat hayotida faol qatnashish va yurt ravnaqiga munosib hissa qo‘shishdir.
Zarif Komilov, O‘zA muxbiri
