Трамп Ҳурмузда кемаларни кузатиш операциясини бошлади (+видео)
DW нашрининг хабар беришича, АҚШ Ҳурмуз бўғозида тўпланиб қолган кемаларни хавфсиз ўтказиш ишларини бошлади. Эрон эса бу ҳаракатни сулҳ келишувини бузиш, деб баҳолаган.
АҚШ президенти Дональд Трамп маълум қилишича, 4 майдан бошлаб Эрон томонидан Ҳурмуз бўғозида тўсиб қўйилган фуқаролик кемаларини Америка ҳарбийлари кузатув остида ўтказишни бошлайди. Бу операция “Озодлик лойиҳаси” деб номланган.
Трамп ўзининг бу ташаббусини 28 февралдан бери можаро сабаб Форс кўрфазида қолиб кетган юзлаб кема экипажлари манфаатига қаратилган гуманитар акция деб атади. Операция эълон қилинган пайтда бўғоз яқинидаги икки кема ҳужумга учрагани ҳақида хабар берилди. Маълумотларга кўра, 29 апрель ҳолатига кўра кўрфазда 900 дан ортиқ тижорат кемаси бўлган.
АҚШ Марказий қўмондонлиги бу операцияда 100 дан ортиқ ҳаво ва денгиз техникаси, дронлар ҳамда 15 минг ҳарбий хизматчи иштирок этаётганини маълум қилди. Пентагон ҳарбий техникаларнинг жойлаштириш тафсилотларини очиқламаган.
Бўғозда туриб қолган танкер ва юк кемаларида тахминан 20 минг нафар денгизчи бор бўлиб, уларнинг аксарияти Ҳиндистон ва Жанубий ҳамда Жануби-Шарқий Осиё давлатлари фуқароларидир. Экипаж аъзоларига кўра, кемаларда ичимлик суви, озиқ-овқат ва бошқа зарур таъминот танқислиги кузатилмоқда, шунингдек, ҳудудда ҳар куни дрон ва ракеталарнинг учиши кузатилмоқда.
Дональд Трамп ижтимоий тармоқда бу операция АҚШ, Яқин Шарқ давлатлари ва айниқса Эрон номидан амалга оширилаётганини ёзди. “Агар бу гуманитар жараёнга қандайдир тўсқинлик қилинса, бундай аралашувга куч билан чек қўйишга тўғри келади”- деб огоҳлантирди АҚШ етакчиси.
Трамп шу билан бирга Эрон билан музокаралар давом этаётганини ва келишувга эришилса барчага ижобий натижа бериши мумкинлигини айтди. Аммо, урушни якунлашга қаратилган 14 бандлик Эрон режаси ҳақида тўхталмади.
Эроннинг IRNA давлат агентлиги Трампнинг Ҳурмуздаги бу операциясини негадир “асоссиз ва мантиқсиз” деб атади. Эрон парламенти миллий хавфсизлик қўмитаси раҳбари Иброҳим Азизий эса ижтимоий тармоқда АҚШнинг Ҳурмуз бўғозидаги жараёнларга ҳар қандай аралашуви 8 апрелдан кучга кирган сулҳни бузиш сифатида баҳоланишини таъкидлади.
Эрон томонидан жорий этилган Ҳурмуз бўғози блокадаси жаҳоннинг нефть, газ ва ўғит бозорларига жиддий таъсир кўрсатди. АҚШ эса жавоб тариқасида Эрон портларига қарши денгиз блокадасини кучайтирган. Сулҳдан бери икки томон ўртасидаги музокараларда деярли силжиш сезилмаяпти.
<iframe width="650" height="420" src="https://www.youtube.com/embed/Xy6iAoVK1zg" title="Tramp Hurmuzda kemalarni kuzatish operatsiyasini boshladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Анвархўжа Аҳмедов, ЎзА
