Республика транспорт прокурори Хоразмдаги йирик лойиҳаларни ўрганди
Ўзбекистон Республикаси Транспорт прокурори Икром Наримов раҳбарлигидаги ишчи гуруҳ томонидан Хоразм вилоятидаги “Urganch xalqaro aeroporti” МЧЖни давлат-хусусий шериклик шартлари асосида жаҳон стандартларига мувофиқ қайта қуриш ва “Умумий фойдаланишдаги автомобиль йўлларини қуриш ва реконструкция қилиш дирекцияси” ДУК буюртмачилигида “Урганч – Хива” пулли автомобиль йўлини қуриш бўйича ишлари ўрганилди.
Хусусан, Ўзбекистон Республикаси Президентининг 2022 йил 28 январдаги тегишли фармони билан тасдиқланган 2022-2026 йилларга мўлжалланган Янги Ўзбекистоннинг тараққиёт стратегиясини “Инсон қадрини улуғлаш ва фаол маҳалла йили”да амалга оширишга оид Давлат дастури ижросини таъминлаш мақсадида Урганч халқаро аэропортини давлат-хусусий шериклик шартлари асосида жаҳон стандартларига мувофиқ қайта қуриш, йўловчилар ва ҳаво кемалари парвозларига юқори даражада хизмат кўрсатилишини таъминлаш доирасида “Урганч халқаро аэропортининг аэродром қисмини комплекс қайта қуриш” лойиҳа ишлари билан танишилди.
Шунингдек, “Урганч – Хива” пулли автомобиль йўлини қуриш бўйича амалга оширилаётган ишлар ҳам ўрганилди.
Жумладан, лойиҳага асосан йўлнинг умумий узунлиги 35 километрни ташкил қилиб, объектда 9 та йўл ўтказгич, 15 та кўприк ҳамда 105 та сув ўтказиш иншоотлари билан танишилди.
Бугунги кунда объектда 34,5 километр ҳудудда унумдор тупроқ қатламини кесиб олиш, тупроқдан кўтарма қуриш, текислаш ва зичлаш ишлари амалга оширилгани, шунингдек, 26 та кўприк ва йўл ўтказгичлари ҳамда 106 та сув ўтказиш иншоотида олиб борилаётган қурилиш-монтаж ишлари ўрганилди.
Ўрганишлар давомида Республика транспорт прокурори қурилиш ишлари сифатини таъминлашга алоҳида эътибор қаратиш, шунингдек, жараёнларда учиш хавфсизлиги талабларига қатъий риоя этиш зарурлигини таъкидлади. Шу билан бирга, соҳа мутасаддиларига тегишли тавсия ва топшириқлар берилди.
Аҳмаджон Шокиров, ЎзА
