Ўзбекистон яна бир халқаро конвенцияга қўшилмоқда
Олий Мажлис Қонунчилик палатасининг мажлисида “Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенциясига Ўзбекистон Республикасининг қўшилиши ҳақида”ги қонун лойиҳаси кўриб чиқилди.
Бугунги кунда халқаро савдо-иқтисодий муносабатлар тобора кенгайиб, турли давлатларда фаолият юритувчи тадбиркорлик субъектлари ўртасида юзага келадиган низоларни тез ва самарали ҳал этишга бўлган эҳтиёж ортиб бормоқда. Медиация ана шундай низоларни судга мурожаат қилмасдан, холис воситачи кўмагида тарафларнинг ўзаро келишуви асосида ҳал этиш имконини беради. Бу тарафларнинг вақт ва маблағини тежаш, ортиқча суд харажатларининг олдини олишга хизмат қилади.
– Ушбу қонун лойиҳаси билан Ўзбекистоннинг “Медиация бўйича Сингапур конвенцияси” номи билан танилган халқаро ҳужжатга қўшилиши назарда тутилмоқда, – деди депутат Гулчеҳра Тожибоева. – Мазкур Конвенция халқаро тижорий низолар бўйича медиация натижасида тузилган келишувларни иштирокчи давлатларда тан олиш ва ижро этишнинг ягона ҳуқуқий механизмларини белгилайди. Хусусан, Ўзбекистон тадбиркори хорижий ҳамкори билан келиб чиққан низони медиация орқали ҳал қилиб, келишувга эришган тақдирда, бу келишувни Конвенция иштирокчиси бўлган бошқа давлатда ижро этиш имконияти енгиллашади. Натижада тарафларнинг келишувни бажартириш учун низони қайтадан судда кўриб чиқишга бўлган эҳтиёжи камаяди.
Қонун лойиҳасида Конвенцияни қўллаш билан боғлиқ айрим шартларни белгилаш ҳам назарда тутилмоқда. Жумладан, Ўзбекистон Республикаси, давлат органи ёки давлат органи номидан ҳаракат қилувчи шахс тараф бўлган келишувларга Конвенция қоидаларини татбиқ этмаслик таклиф этилмоқда.
Шунингдек, Конвенция фақат келишув тарафлари уни ўз муносабатларига нисбатан қўллашга розилик билдирган тақдирдагина татбиқ этилиши белгиланяпти. Бу эса тадбиркорлик субъектларига мазкур халқаро механизмдан фойдаланиш масаласини мустақил ҳал этиш имконини беради.
Ушбу Конвенцияга қўшилиш мамлакатимизда медиация институтини янада ривожлантириш, халқаро тижорий низоларни қисқа муддатда ва кам харажат билан ҳал этиш, тадбиркорларнинг ҳуқуқ ва қонуний манфаатларини ишончли ҳимоя қилишга хизмат қилади. Шу билан бирга, Ўзбекистоннинг инвестициявий жозибадорлигини оширишга, хорижий инвесторларнинг миллий ҳуқуқий тизимга бўлган ишончини мустаҳкамлашга ҳамда қулай ишбилармонлик муҳитини янада яхшилашга кўмаклашади.
М.Комилова, ЎзА
