Ўзбекистон ва Таиланд компанияси ўртасида инвестициявий ҳамкорлик истиқболлари муҳокама қилинди
Қишлоқ хўжалиги вазирлиги мутасаддилари Таиланднинг Charoen Pokphand Foods Public Company Ltd. (CPF) компаниясининг Россиядаги ваколатхонаси бош директори Бурее Срина бошчилигидаги делегация аъзолари билан учрашди.
Мулоқотда қишлоқ хўжалиги ва озиқ-овқат саноати соҳаларида инвестициявий ҳамкорликни ривожлантириш, мавжуд имкониятларни ўрганиш ҳамда қўшма инвестиция лойиҳаларини ишлаб чиқиш масалалари муҳокама қилинди.
Учрашув аввалида CPF компанияси, унинг асосий фаолият йўналишлари, агросаноат ва озиқ-овқат соҳаларидаги тажрибаси, халқаро фаолияти ҳамда инвестиция лойиҳалари ҳақида маълумот берилди. Шунингдек, компаниянинг Россиядаги паррандачилик фабрикаси фаолиятига бағишланган тақдимот намойиш этилди.
Мулоқотда ҳамкорликнинг устувор йўналишлари сифатида чорва моллари ва паррандалар учун озуқа ишлаб чиқариш, паррандачилик ва чорвачиликни ривожлантириш, замонавий қишлоқ хўжалиги технологияларини жорий этиш, шунингдек, биологик хавфсизлик технологиялари ва тизимларини татбиқ қилиш масалаларига алоҳида эътибор қаратилди.
Учрашув якунида истиқболли лойиҳаларни аниқлаш, ҳамкорлик шаклларини белгилаш, инвестиция ҳажми ва зарур ресурсларни баҳолаш ҳамда лойиҳаларни тайёрлаш юзасидан фикр алмашилди.
Муҳайё Тошқораева, ЎзА
