Ўзбекистон ва Малайзия озиқ-овқат хавфсизлигида ҳамкорликни кучайтиради
Озиқ-овқат хавфсизлиги, халқаро стандартлар ва лаборатория салоҳиятини ошириш масалалари кўриб чиқилди
Ўзбекистон техник жиҳатдан тартибга солиш агентлигида Malaysia Palm Oil Council (MPOC) делегацияси вакиллари билан учрашув бўлиб ўтди.
Мулоқотда Агентлик директори ўринбосари Жўрабек Шакаров ҳамда MPOC делегацияси вакиллари иштирок этди. Учрашув давомида озиқ-овқат маҳсулотлари хавфсизлигини таъминлаш, халқаро стандартларни ишлаб чиқиш ва амалиётга жорий этиш, шунингдек, маҳсулотлар сифати ва хавфсизлигини баҳолаш тизимини такомиллаштириш масалалари юзасидан фикр алмашилди.
Таъкидланганидек, замонавий бозор шароитида маҳсулот сифати ва хавфсизлигини таъминлаш нафақат истеъмолчилар ҳуқуқларини ҳимоя қилиш, балки ташқи савдони ривожлантириш ва халқаро бозорларга чиқиш учун ҳам муҳим аҳамиятга эга.
Учрашув доирасида MPOC делегацияси Агентлик тизимидаги замонавий синов лабораториялари фаолияти билан танишди. Хорижий меҳмонларга юқори аниқликдаги синов ускуналари, маҳсулотларни халқаро талаблар асосида текшириш, уларнинг сифат ва хавфсизлик кўрсаткичларини баҳолаш ҳамда мувофиқлигини аниқлаш жараёнлари ҳақида маълумот берилди.
Лаборатория салоҳиятининг юқори даражада бўлиши маҳсулотларни ишончли ва холис баҳолаш, техник регламентлар талабларига риоя этилишини таъминлаш ҳамда миллий маҳсулотларнинг халқаро бозорларда рақобатбардошлигини оширишда муҳим омил ҳисобланади.
Музокаралар давомида техник жиҳатдан тартибга солиш, стандартлаштириш, мувофиқликни баҳолаш ва лаборатория синовлари соҳаларида тажриба алмашиш масалаларига алоҳида эътибор қаратилди.
Шунингдек, мутахассислар малакасини ошириш, қўшма семинар ва ўқув дастурларини ташкил этиш, соҳадаги илғор хорижий тажрибани ўрганиш ҳамда икки томонлама амалий ҳамкорликни ривожлантириш бўйича келишувларга эришилди.
Бундай ҳамкорлик техник жиҳатдан тартибга солиш тизимида замонавий ёндашувларни жорий этиш, мутахассислар салоҳиятини ошириш ва маҳсулотларни баҳолаш жараёнларининг халқаро мезонларга мувофиқлигини таъминлашга хизмат қилиши мумкин.
Учрашув якунида томонлар ҳамкорликни янада кенгайтириш, ўзаро манфаатли қўшма лойиҳаларни амалга ошириш ва тажриба алмашинувини изчил давом эттиришга тайёр эканликларини билдирди.
Умуман, Ўзбекистон ва Малайзия ўртасида техник жиҳатдан тартибга солиш ҳамда озиқ-овқат маҳсулотлари хавфсизлиги соҳаларидаги ҳамкорликнинг ривожланиши маҳсулотлар сифатини ошириш, замонавий синов механизмларини такомиллаштириш ва халқаро стандартларни миллий амалиётга кенгроқ жорий этиш учун янги имкониятлар яратади.
Ш.Маматуропова, ЎзА
