Нодирбек Ёқуббоев Абдусатторов ва Карлсен қаторига қўшилиш остонасида
Самарқандда якунланган 46-Бутунжаҳон шахмат олимпиадасида ўзига хос ўйин намойиш этган ҳамюртимиз Нодирбек Ёқуббоев 2027 йилги “FIDE Freestyle Chess World Championship” йўлланмаси учун курашиш имкониятига эга бўлганлар қаторидан жой олди.
Ёқуббоев ҳозирда мазкур чемпионатда иштирок этиш учун курашаётганлар рўйхатининг умумий рейтингида 43 очко билан 3-ўринда ҳаракатланмоқда.
Турнирнинг 2 октябрь куни якунланган биринчи қисмида пешқадамликка эришган ҳиндистонлик Пранав Венкатеш 2027 йилги “FIDE Freestyle Chess World Championship” йўлланмасини қўлга киритди.
Энди декабрь ойигача давом этадиган иккинчи қисм мусобақалар якунида яна бир шахматчи жаҳон чемпионати йўлланмасини қўлга киритади.
Нодирбек Ёқуббоевнинг асосий рақибларидан бири украиналик Олександр Бортнюк 60 очко жамғарган бўлиб, улар орасидаги фарқ 17 очкони ташкил этган.
Ҳар бир Freestyle Friday’ мусобақасида ғолиблик учун 10 очко тақдим этилишини ҳисобга олсак, Нодирбекнинг 2027 йилги “FIDE Freestyle Chess World Championship” йўлланмасини қўлга киритиши учун имконияти ҳамон юқори эканлигини кўрсатмоқда.
Айтиш лозимки, бугунгача 2027 йилги “FIDE Freestyle Chess World Championship” мусобақасида иштирок этиш ҳуқуқини Магнус Карлсен, Фабиона Каруна, Нодирбек Абдусатторов, Винсент Каймер ва Пранав Венкатеш қўлга киритган.
Эслатиб ўтамиз, фристайл йўналиши бўйича 2027 йилги жаҳон чемпионати келгуси йилнинг 12-14 февраль кунлари бўлиб ўтади. Унинг саралаш мусобақалари ҳафтанинг ҳар жума куни онлайн тарзда ўтказилиб, жорий йил 4 декабрга қадар давом этади.
Т. Рўзиев, ЎзА
