Халқаро турнирда андижонлик ёш футболчилар ғолиб бўлди
Андижон шаҳридаги футбол академиясида футбол бўйича “Andijon OPEN” халқаро турнири бўлиб ўтди.
Андижон вилояти ҳокимлиги, спорт бошқармаси, футбол федерацияси ҳамкорлигида ташкил этилган турнирда 2011 йилда туғилган болалардан тузилган Андижон футбол академиясининг "Andijon", Беларусь Республикасининг "Vitebsk" ҳамда Қирғизистон Республикасининг "O'sh-AFIM" жамоалари иштирок этиб ғолиблик учун баҳс олиб борди.
Турнир учрашувларида қуйидаги натижалар қайд этилди:
"Andijon" - "Vitebsk" 3:1
"Vitebsk" - "O'sh-AFIM" 1:0
"Andijon" - "O'sh-AFIM" 0:0
Якуний натижаларга кўра турнирда 4 очко жамғарган "Andijon" жамоаси биринчи ўринни қўлга киритди.
Беларуслик ёш футболчилар 3 очко билан иккинчи, қирғизистонлик футболчилар 1 очко билан учинчи ўринни банд этди.
Кенг жамоатчилик вакиллари иштирокида ўтказилган тақдирлаш маросимида ғолиб жамоага “Andijon OPEN” кубоги тантанали равишда топширилди. Шунингдек, иштирокчи жамоалар ҳамда турнирнинг “Энг яхши дарвозабони”, “Энг яхши ҳимоячиси”, “Энг яхши ҳужумчиси” ҳам рағбатлантирилди.
Муросасиз баҳслар, ёрқин ўйинлар ва унутилмас лаҳзаларга бой мусобақа нафақат ғолибларни аниқлади, балки турли мамлакат вакилларини футбол ва дўстлик атрофида бирлаштирди. Зеро, спортнинг энг катта ғалабаси халқларни бир-бирига янада яқинлаштиришдир.
Фахриддин Убайдуллаев,
ЎзА мухбири
