Мустақиллигимизнинг 35 йиллиги олдидан

ФОТОГАЛЕРЕЯ: Фарғонада — Янги Ўзбекистон нафаси

Фарғона водийси... Бу ном тилга олинганда кўз олдимизга, аввало, серҳосил далалар, файзли маҳаллалар, қадимий ҳунармандчилик ва меҳнатсевар инсонлар келади. Бугун бу анъанавий қиёфа замонавий саноат, инновация, таълим ва туризм имкониятлари билан бойиб бормоқда.

Фарғона вилоятида азалдан шаклланган тадбиркорлик ва ҳунармандчилик маданияти янги иқтисодий шароитда янада кенг имкониятларга эга бўлмоқда. Корхоналарда замонавий технологиялар жорий қилиниб, тўқимачилик, қурилиш материаллари, озиқ-овқат ва бошқа тармоқларда янги ишлаб чиқариш қувватлари пайдо бўлмоқда. Бу жараён янги иш ўринлари ва экспорт имкониятларини ҳам кенгайтирмоқда. 2026 йилда вилоятда саноат, қишлоқ хўжалиги, сервис ва туризм йўналишларида йирик лойиҳаларни амалга ошириш режалаштирилган.

Фарғонанинг иқтисодий ҳаётини қишлоқ хўжалигисиз тасаввур этиш қийин. Олтиариқнинг узумзорлари, Қуванинг боғлари, Риштон ва атроф ҳудудлардаги деҳқончилик анъаналари замонавий агротехнологиялар билан уйғунлашмоқда. Интенсив боғлар, экспортбоп маҳсулотлар, қайта ишлаш ва сақлаш имкониятлари аграр тармоқнинг даромаддорлигини оширишга хизмат қилмоқда.

Вилоятнинг ўзига хослиги фақат иқтисодиётда эмас. Қадимий шаҳарлар, кулолчилик ва ҳунармандчилик мактаблари, миллий меъморчилик анъаналари Фарғонанинг маънавий қиёфасини белгилаб беради. Риштон кулолчилиги, Қўқоннинг тарихий обидалари, Марғилоннинг атлас ва адрас мактаби — асрлардан келаётган мероснинг бугунги ҳаётдаги давомидир.
Фарғона тоғлари эса вилоятнинг яна бир бетакрор қиррасини намоён этади. Шоҳимардон, Водил, Аввал, Чимён каби масканларнинг табиий салоҳияти туризмни ривожлантириш учун янги имкониятлар очмоқда. Замонавий дам олиш масканлари, меҳмон уйлари ва туристик инфратузилма лойиҳалари бу ҳудудларнинг сайёҳлик қиёфасини ўзгартирмоқда.

[gallery-31139]

Таълим ва илм-фан соҳасидаги натижалар ҳам водийнинг интеллектуал салоҳияти юксалаётганидан далолат беради. Янги мактаблар, хусусий таълим муассасалари, замонавий лабораториялар ва ёшлар учун яратилаётган имкониятлар келажак авлодга қаратилган эътиборнинг амалий ифодасидир.

Спорт майдонларидаги шижоат, тиббиёт муассасаларидаги янгиланишлар, обод маҳаллалар ва кундалик ҳаётдаги ўзгаришлар эса бу тараққиётнинг марказида инсон турганини кўрсатади.
Ушбу фотогалерея Фарғонанинг ана шу ранг-баранг ҳаётидан лавҳаларни жамлайди: даладаги меҳнат, корхонадаги иш жараёни, устахонадаги ҳунарманд, синфхонадаги ўқувчи, спорт майдонидаги ёш ва тоғ бағридаги сайёҳлик манзаралари...

Фарғона — ўтмиш анъаналари ва бугунги янгиланишлар бир-бирига уйғунлашган, меҳнат ва маърифат қадрланган, инсон салоҳияти тараққиётнинг асосий кучига айланаётган замин.

Муқимжон ҚОДИРОВ (сурат), ЎзА