Гуанчжоудағы халықаралық көрмеде Өзбекстанның туристік әлеуеті таныстырылды
«Guangzhou International Tourism Fair» аясында Өзбекстанның туристік әлеуетіне арналған таныстырылым өтті.
Dunyo ақпарат агенттігінің хабарлауынша, Өзбекстанның Бас консулдығы ұйымдастырған таныстырылым барысында қатысушыларға елдің көпғасырлық тарихи-мәдени мұрасы, ұлттық құндылықтары мен дәстүрлері, сондай-ақ туризм саласында жүзеге асырылып жатқан ауқымды реформалар туралы кеңінен мәлімет берілді.
Іс-шара аясында экологиялық туризмді дамыту мәселесіне ерекше назар аударылды. Атап айтқанда, таулы аймақтарда салынған заманауи демалыс кешендері, туристерге жасалған инфрақұрылым, қауіпсіздікті қамтамасыз ету және туристік қызмет сапасын арттыруға бағытталған нақты шаралар таныстырылды.
Сонымен қатар, көрме барысында шетелдік туристік агенттіктер мен компаниялар өкілдерімен кездесулер өтіп, онда Өзбекстанға келетін туристер ағынын арттыру, ынтымақтастықты нығайту және бірлескен жобаларды жүзеге асыру мәселелері талқыланды.
Өзбекстанның бай тарихи мұрасы, көне шаһарлары мен заманауи туристік инфрақұрылымы елдің әлемдік туризм нарығындағы тартымдылығын жылдан-жылға арттырып келеді.
