Өзбекстан мен Қытай туризм саласында жаңа жобаларды қолға алмақ
Қытайдың Сиань қаласында өткен «III Өзбекстан – Қытай өңіраралық форумы» аясында Туризм комитетінің төрағасы А.Аққулов Қытайдың «Fei Jing Tourism» компаниясының вице-президенті Вэй Жие, «Winner Hydrogen» бас директоры Ло Тианши және «Shaanxi Tourism Group» бас директорының орынбасары Сзао Юевангпен келіссөздер жүргізді.
Көне Жібек жолы бойындағы байланыстар бүгінде туризм арқылы жаңа мазмұнға ие болуда. Екі ел арасындағы мәдени және туристік ынтымақтастық халықтарды жақындастырып қана қоймай, экономикалық серіктестіктің де жаңа мүмкіндіктерін ашып отыр.
«Fei Jing Tourism» компаниясымен Қытайдан туристерді Өзбекстанға тарту және компанияның елдегі туризм саласындағы қызмет аясын кеңейту мәселелері талқыланды. Өз кезегінде компания жоғары және бизнес сегменттегі клиенттердің сұранысына сай кемінде 80 бөлмесі бар қонақ үйлерді басқаруға алып, 4 және 5 жұлдызды қытайлық брендтерді тартуға қызығушылық білдірді.
Ал «Winner Hydrogen» компаниясымен өткен келіссөздер барысында туристік көлік қызметін кеңейту жобалары қарастырылды. Өзбекстан туризм нарығына жеткізілетін «Yutong», «Golden Dragon», «King Long» және өзге де автобустарға кешенді техникалық қызмет көрсететін орталық ашу жөнінде алдын ала келісімдерге қол жеткізілді.
Сондай-ақ «Shaanxi Tourism Group» компаниясымен Шэньси провинциясынан келетін туристер ағынын арттыру, тақырыптық саябақтар мен басқа да туристік жобаларды бірлесіп жүзеге асыру мәселелері талқыланды.
Аталған компания Сиань қаласында 40 гектар аумақта «Жібек жолы» тақырыптық саябағын салған. Кешен күніне 40 мыңға дейін турист қабылдай алады.
Бүгінде Өзбекстан тарихи мұрасы мен заманауи туристік инфрақұрылымды ұштастыра отырып, халықаралық туризмнің маңызды бағыттарының біріне айналуда. Бұл жобалар екі ел арасындағы туристік алмасуды арттырып, Ұлы Жібек жолының рухын жаңа қырынан жаңғыртуға жол ашады.
Қытай тарапымен «Жібек жолы» тақырыптық саябағының келесі жобасын Өзбекстанда, соның ішінде «Самарқанд туризм орталығына» іргелес аумақта жүзеге асыру мүмкіндіктері қарастырылып жатыр.
