Французлар Макронга ишонмай қўйдими?

Франция президенти Эммануэль Макроннинг оммавий қўллаб-қувватлаш даражаси 2017 йилда ҳокимиятга келганидан буён энг паст кўрсаткичга тушди. “Ipsos BVA-Cesi” сўровига кўра, французларнинг атиги 15 фоизи президент фаолиятини ижобий баҳолаган, 82 фоизи эса ундан норози.

Мамлакатда аҳолининг харид қобилияти, ижтимоий таъминот тизимининг келажаги ва давлат қарзи асосий ташвишлар бўлиб қолмоқда. Парламентда бюджет муҳокамаларининг мураккаб бошлангани, мактаб ўқувчиларининг намойишлари ва ёқилғи билан боғлиқ муаммолар ўлкада сиёсий вазиятни янада қийинлаштирмоқда.

Макроннинг эҳтимолий сиёсий ворислари орасида ўнг популистлар — Жордан Барделла ва Марин Ле Пен ҳануз олдинда, аммо уларнинг рейтинги ҳам пасайган: Барделланики уч, Ле Пенники тўрт фоиз тушиб, мос равишда 33 ва 32 фоизни ташкил этди.

Бу пасайиш “Mediapart” нашри Барделланинг “Facebook” аккаунтидан антисемитик ва фитна назарияларига оид хабарлар тарқатилгани ҳақида материаллар эълон қилганидан кейин кузатилди, у айбловларни рад этган.

Мусулмон Зиё, ЎзА