Трамп: Украинага янги президент керак
Оқ уй раҳбари Дональд Трамп Украина етакчиси Владимир Зеленскийни танқид қилиб, мамлакатга янги президент кераклигини айтди. Бунга Зеленскийнинг Россиядан АҚШга дизель ёқилғиси етказиб бериш бўйича келишувга қарши чиққани ва Москвага қарши нефть заводларига зарбаларни тўхтатишдан бош тортгани сабаб бўлди.
Трампнинг айтишича, Зеленский РФ нефтьни қайта ишлаш заводларига ҳужумларни тўхтатиши керак, чунки бу жаҳон энергетика бозорига таъсир қилмоқда. Қўшма Штатлар жума куни рус дизель экспортига нисбатан санкцияларни 7 апрелгача тўхтатиш бўйича Москва билан келишувга эришганини тасдиқлаган.
Келишув доирасида Россия дастлаб 300 минг тонна дизель етказиб бериши, кейин эса қўшимча ҳажмлар бозорга чиқарилиши кутилмоқда. Зеленский эса бу Путинга урушни давом эттириш учун қўшимча маблағ беради, деб ҳисоблайди.
Европа Иттифоқи ташқи ишлар раҳбари Кая Каллас ҳам санкцияларни юмшатиш Москва даромадларини ошириб, низони молиялаштиришга хизмат қилишини таъкидлади. Шу билан бирга, Зеленский сайлов ўтказиш масаласида Украинада ҳарбий ҳолат амал қилаётганини эслатди: қонунчиликка кўра, бу даврда сайловлар ўтказилмайди.
У Россия 60 кунлик тўлиқ ўт очишни тўхтатишга рози бўлса, сайловларни ташкил этиш мумкинлигини билдирган.
Мусулмон Зиё, ЎзА
