Францияда ички ишлар вазири истеъфоси рад этилди (+видео)
Елисей саройи маълум қилишича, Франция Президенти айни вазиятда ҳуқуқ-тартибот идораларига узлуксиз раҳбарлик таъминланиши заруратини инобатга олиб, ички ишлар вазири истеъфосини қабул қилмаган. Макрон дизель ёнилғиси етказиб бериш масаласини ҳал қилиш учун Яқин Шарққа йўл олмоқда. Бу ҳақда “Euronews” хабар берди.
17 октябрь куни Франциянинг бир неча йирик шаҳрида кўплаб зўравонлик ҳолатлари содир этилди. Воқеа ижтимоий-иқтисодий норозилик ортидан келиб чиққан. Хусусан, мактаблардаги муаммо, турмуш қиймати ошиши ва турли гуруҳлар бирлашиши сабаб жараён кескин тус олган.
Шу ҳодисалар ортидан ички ишлар вазири Лоран Нуньес Президент Эммануэль Макрондан истеъфо сўраган. Президент эса аризани қабул қилмаган.
Душанба куни эрталаб Елисей саройи эълон қилган расмий баёнотда Макрон вазирга “тартибсизлик ва вайронкор ҳаракат иштирокчиларига қарши чора кўриш” вазифасини топширгани акс этган.
Президент маъмурияти раддия сабабини “ҳозирги шароитда ҳуқуқ-тартибот кучларига узлуксиз раҳбарлик таъминланиши зарурати” билан изоҳлаган.
Шунингдек, Макрон кўплаб савдо нуқталари талон-тарож қилинишига олиб келган ҳаракатлар туфайли вазиятни олдиндан баҳолаш ва самарали разведка фаолияти юритишдаги камчиликларни қайд этган.
Президент 17 октябрь куни содир бўлган зўравонлик юзасидан якшанба оқшомида берилган баёнотдан сўнг ҳам Форс кўрфази мамлакатларига режалаштирилган дипломатик сафарига ўзгариш киритмади.
Бугундан Макрон Кувайт, Бирлашган Араб Амирликлари, Баҳрайн ва Қатарга сафар уюштиради. Мақсад – нефть ва дизель ёнилғиси етказилишини таъминлаш орқали нарх пасайишига кўмаклашиш.
Кенжа Бекжонов, Улуғбек Тўхтаев (видео), ЎзА
