Anadolu: Путининг “учлик” таклифи
Россия Федерацияси ташқи ишлар вазири ўринбосари Андрей Руденко маълум қилишича, Украинадаги вазиятни тартибга солиш бўйича Россия, АҚШ ва Хитой ўртасида учрашув ўтказиш бўйича якуний келишувга ҳали эришилмаган бўлса-да, ҳар уч давлат томонидан ушбу масалага қизиқиш бор.
Дипломат таъкидлашича, амалий жиҳатдан мавзу ҳозирча муҳокама қилинаётгани йўқ. Аввалроқ “The Wall Street Journal” РФ Президенти Владимир Путин 9 октябрь куни АҚШ етакчиси Дональд Трамп билан телефон орқали мулоқот чоғида Украина можаросини муҳокама қилиш учун уч томонлама учрашув ўтказишни таклиф қилгани ҳақида хабар берган эди.
Кремль вакили Дмитрий Песков ҳам шундай мулоқот ўтказиш имконияти кўриб чиқилаётгани, ҳали аниқ келишув йўқлигини тасдиқлаган. Россия томони тадбирни 18-19 ноябрь кунлари Хитойда ўтадиган Осиё-Тинч океани иқтисодий ҳамкорлиги саммити доирасида ташкил этиш таклифини илгари сурган.
Руденко Жанубий Корея ҳукуматининг Россия билан муносабатни меъёрига келтириш истаги хусусидаги баёнотига ҳам тўхталди. Яъни, Сеул бу масала фақат геосиёсий вазият ўзгариб, Украина билан можаро якунлангандан кейингина кўтарилиши мумкинлигини айтган.
РФ ТИВ раҳбари ўринбосари Жанубий Корея билан муносабат узилишига Москва сабабчи эмаслиги, балки Сеул Россияга қарши киритилган санкцияни маъқуллаганига урғу берган.
Ф.Яхшибоева, ЎзА
