ЕИда 15 ёшли ўқувчиларнинг сунъий интеллект бўйича саводхонлиги баҳоланади
Европа Иттифоқи 2027-2028 ўқув йилидан бошлаб 15 ёшли ўқувчиларга сунъий интеллект ҳақидаги билимларни тасдиқловчи сертификат беришни режалаштирмоқда. Ушбу ташаббус ўсмирларга СИ тамойилларини тушунишга, маълумотлар тўғрилигини текширишга, фирибгарликларни аниқлашга ва технология билан боғлиқ хавфларни баҳолашга ёрдам бериш учун мўлжалланган.
Европа Комиссияси вице-президенти Роксана Минзату таъкидлашича, СИ бўйича ўқув дастурлари ўқувчиларга нафақат сунъий интеллектдан қандай фойдаланишни, балки ундан қачон фойдаланмаслик кераклигини ҳам ўргатиши керак.
Ўқувчиларнинг таълимдаги ютуқларини баҳолаш халқаро дастури (PISA) маълумотларига кўра, ЕИдаги ҳар уч 15 ёшли ўқувчидан тахминан биттаси ўқиш ёки математикадан қийналади. Брюссель сунъий интеллектдан самарали фойдаланиш ўрганишни янада самаралироқ қилишга ва таълим имкониятларини кенгайтиришга ёрдам беришига умид қилмоқда.
Европа Комиссияси сунъий интеллект саводхонлигини ривожлантириш ёшларнинг ижтимоий тармоқларга киришини чеклаш режаларига зид келмаслигини таъкидламоқда. Минзатунинг сўзларига кўра, СИдан таълимда фойдаланиш гиёҳвандликка олиб келиши мумкин бўлган платформа алгоритмларидан фойдаланишдан фарқ қилади.
С.Раҳимов, ЎзА
