Davlat xaridi predmetining o‘rtacha bozor hamda boshlang‘ich narxini aniqlash tartibi belgilandi

Davlat xaridlari tizimida muhim yangilik: bozor narxlarini aniqlash bo‘yicha vaqtinchalik nizom tasdiqlandi. Bu qaror davlat mablag‘laridan foydalanish samaradorligini oshiradimi?

Hukumatning tegishli qarori bilan “Davlat xaridi predmetining o‘rtacha bozor hamda boshlang‘ich narxini aniqlash tartibi to‘g‘risida”gi vaqtinchalik nizom tasdiqlandi.

2026-yilning 8-sentabrida qabul qilingan mazkur Vaqtinchalik nizom davlat buyurtmachilari tomonidan davlat xaridlarini amalga oshirish uchun davlat xaridi predmetining o‘rtacha bozor hamda boshlang‘ich narxini aniqlash tartibini belgilaydi.

Mazkur Vaqtinchalik nizom 2028-yil 31-dekabrgacha amal qiladi.

Nizomga ko‘ra, davlat buyurtmachisi:

Davlat xaridlari uchun ajratilgan mablag‘lardan samarali foydalanishi, shu jumladan, tovarlarni (ishlarni, xizmatlarni) xarid qilishdan ko‘rilgan foyda (naf), ularning sifati va qiymati o‘rtasidagi maqbul nisbatni ta’minlashi;

Davlat xaridlarining maqsadga muvofiqligi va zarurligi, tovarni (ishni, xizmatni) tanlashda uning xususiyatlari, shuningdek, davlat xaridlarini o‘tkazish xarajatlarini va tovar (ish, xizmat) qiymatining asoslanganini hisobga olgan holda amalga oshirishi;

Har bir davlat xaridini amalga oshirishda xarid predmetining o‘rtacha bozor narxini o‘rganishi shart.

Xarid qilish tartib-taomillarini amalga oshirishdan oldin davlat buyurtmachisi narxlar moduli orqali xarid predmetining o‘rtacha bozor narxini shakllantirishda oxirgi 90 kunda shakllangan bozor narxlari bo‘yicha ma’lumotlardan foydalanadi.

Xarid predmetining o‘rtacha bozor va boshlang‘ich narxi elektron ma’lumotnomasi belgilangan namunaviy shaklda shakllantiriladi va unda quyidagilar aks ettiriladi:

Xarid predmeti;

O‘rganilgan manbalar, shu jumladan, tovarlar (ish, xizmatlar) haqidagi ma’lumotlar;

Xarid predmetining o‘rtacha bozor va boshlang‘ich narxini aniqlash bo‘yicha hisob-kitoblar.

Sherbek Islomov, O‘zA