Асосий мақсад - мурожаатлар сонини эмас, муаммоларни камайтириш

Фуқаролар ва тадбиркорларнинг мурожаатлари давлат идоралари фаолияти самарадорлигини баҳолашда муҳим мезонлардан бири ҳисобланади. Чунки ҳар бир мурожаат ортида муайян муаммо, ечимини кутаётган масала ва масъул ташкилот эътиборини талаб қиладиган ҳолат мавжуд.

“Ўзагроинспекция” матбуот хизмати томонидан 2026 йилнинг ўтган даврида жисмоний ва юридик шахслардан келиб тушган мурожаатлар бўйича маълумотлар тақдим этилди.

Қайд этилишича, жорий йилнинг январь–октябрь ойларида Инспекцияга жами 1 минг 455 та мурожаат келиб тушган. Шундан 814 таси жисмоний, 641 таси эса юридик шахслар ҳиссасига тўғри келади. Ҳисобот даврида Инспекция томонидан 1 минг 255 та мурожаат кўриб чиқилган. Уларнинг 774 таси ижобий ҳал этилган, 468 таси юзасидан ҳуқуқий тушунтириш берилган, 13 тасини қаноатлантириш рад этилган. Шунингдек, 149 та мурожаат тегишлилиги бўйича бошқа идора ва ташкилотларга юборилган.

Қонунчиликка мувофиқ, 1 та мурожаат кўрмай қолдирилган, 26 та мурожаатни кўриб чиқиш тугатилган. Айни пайтда 24 та мурожаат кўриб чиқиш жараёнида. Келиб тушган мурожаатларнинг мазмун-моҳияти таҳлил қилинганда, уларнинг энг катта қисми қишлоқ хўжалигига мўлжалланган ерлардан фойдаланиш билан боғлиқ экани маълум бўлади. Қишлоқ хўжалиги техникалари, агротехник тадбирлар ва уруғчилик билан боғлиқ мурожаатлар ҳам салмоқли ўринни эгаллаган.

Фуқаролар ва тадбиркорлар ўз мурожаатларини Инспекциянинг ишонч телефони ҳамда Телеграм ижтимоий тармоғи орқали ҳам юборишлари мумкин. Ушбу каналлар орқали келиб тушган мурожаатлар белгиланган тартибда кўриб чиқилиб, мурожаатчиларга тегишли жавоблар тақдим этилмоқда.

Бундан ташқари, мурожаатлар ижроси Президент виртуал қабулхонаси, Тадбиркорлар виртуал офиси, EDO ijro.uz ва Uzagroin электрон дастурлари орқали назорат қилиб борилмоқда. Ҳар ой якунида мурожаатлар билан ишлаш натижалари умумлаштирилиб, Инспекциянинг расмий веб-сайтидаги Очиқ маълумотлар порталига жойлаштириш учун матбуот котибига тақдим этилмоқда.

Муҳайё Тошқораева,

ЎзА