"ANSA": Қуёш тизими кутилганидан эртароқ парчаланиши мумкин
Қуёш тизимининг парчаланиши олимлар аввал тахмин қилганидан анча эрта содир бўлиши мумкин. Бу ҳақда Италиядаги ахборот ҳамкоримиз - "ANSA" ёзмоқда.
Калифорния технология институти олимлари томонидан ўтказилган тадқиқот натижаларига кўра, Юпитер, Сатурн, Уран ва Нептун сайёралари Қуёш фаолияти тугаганидан кейин тахмин қилинганидек 100 миллиард йил эмас, балки атиги бир миллиард йил сақланиб қолиши мумкин. Тадқиқот натижалари “The Astrophysical Journal Letters” илмий журналида эълон қилинган.
Олимларнинг прогнозларига кўра, тахминан беш миллиард йилдан кейин Қуёш ядросидаги водород захираси тугайди. Натижада у кенгайиб, Меркурий ва Венерани ўз ичига ютиши мумкин. Ер эса сақланиб қолган тақдирда ҳам ҳаёт учун яроқсиз, ўта иссиқ сайёрага айланади.
Константин Батигин бошчилигидаги тадқиқотчилар Қуёш эволюцияси ва сайёралар орбитасидаги ўзгаришларни ўрганиш мақсадида 672 та компьютер моделини синовдан ўтказди.
Натижаларга кўра, сценарийларнинг 96 фоизида Қуёш оқ митти юлдузга айланганидан кейинги уч миллиард йил ичида сайёралар орбитасида жиддий беқарорлик юзага келиши мумкин. Айрим моделларда сайёраларнинг Қуёш тизимидан чиқиб кетиши, бошқаларида эса Уран ва Нептун орбиталарининг ўзаро алмашиши кузатилган.
Олимлар ушбу натижалар Қуёш тизимининг узоқ келажагига оид аввалги тасаввурларни қайта кўриб чиқиш зарурлигини кўрсатишини таъкидламоқда.
Ф.Яхшибоева, ЎзА
