Зеленский: Украина муносиб тарзда жавоб қайтаради (+видео)
Зеленский Россияни ўт очишни тўхтатиш бўйича уринишларни рад этаётганликда айблади, деб хабар берди Euronews.
Зеленскийнинг сўзларига кўра, ўт очишни тўхтатиш таклифларига Россия деярли ҳар соатда Украина бўйлаб янги зарбалар бермоқда. У Москвани огоҳлантириб, бу ҳужумларга Украина муносиб жавоб қатаришини айтди.
“Вазиятдан келиб чиқиб, биз ўзимизнинг мутлақо асосли жавоб чораларимизни белгилаймиз”, — деди Украина раҳбари.
Шунингдек, Зеленский Россияга сулҳ ва дипломатия бўйича Украина томонидан аниқ таклиф берилганини таъкидлади.
“Россия биздан тинчлик ва дипломатия бўйича аниқ таклиф олди ва тафсилотларни келишиб олиш учун Украина ёки ҳамкорларимиз билан қандай боғланишни яхши билади”, — деди у.
Аввалроқ Россия 8–9 май кунлари учун бир томонлама икки кунлик сулҳ эълон қилган эди. Бу муддат Москвадаги Қизил майдонда ўтадиган Ғалаба паради билан боғлиқ.
Украина эса ўз навбатида 6 май ярим тунда бошланадиган ўт очишни тўхтатиш режасини таклиф қилди. Бироқ Зеленскийнинг айтишича, Киев таклиф қилган сулҳнинг дастлабки 10 соати ичида Россия қўшинлари уни 1820 марта бузган. Масалан, чоршанба куни эрталаб Россия Суми вилоятидаги болалар боғчасига зарба берган. Ҳужум оқибатида икки киши ҳалок бўлган. Ҳодиса вақтида боғчада болалар бўлмаган.
Россия Украина таклиф қилган сулҳни рад этгани маълум бўлганидан кейин, эътибор Россия тақвимидаги энг муҳим саналардан бири — Ғалаба кунига қаратилди. Бу кунда Иккинчи жаҳон уруши якунлангани кенг кўламли тадбирлар билан нишонланади.
Одатда бу байрам Россия ҳарбий қудрати намойиши сифатида ўтказилади. Бу йил Кремль тадбир кўламини қисқартиришга қарор қилди. Хавфсизлик сабабли ҳарбий техникаларни намойиш қилиш режалаштирилмаган.
Россиянинг баъзи ҳудудларида хавфсизлик сабаб Ғалаба куни тадбирларини ўтказиш умуман бекор қилинган.
Чунки, Украина қўшинлари Москвадан анча узоқдаги нишонларга ҳам зарба бера олишини кўрсатди. Масалан, сешанба куни Украина шаҳридаги муҳим ҳарбий-саноат мажмуасига ҳужум уюштирди. Бу ҳудуд Украина чегарасидан тахминан 1000 километр узоқда жойлашган.
<iframe width="650" height="420" src="https://www.youtube.com/embed/xucmjN-Bd8Q" title="Zelenskiy: Ukraina munosib tarzda javob qaytaradi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Кенжа Бекжонов, Салимжон Обиджонов, ЎзА
