Загребда бугун Абдусатторов – Гукеш “жанги” бўлиб ўтади
Бугун, 3 июль куни Хорватиянинг Загреб шаҳрида давом этаётган “SuperUnited Rapid & Blitz Croatia 2026” мусобақасида ҳамюртимиз Нодирбек Абдусатторов амалдаги Жаҳон чемпиони ҳиндистонлик Доммаражу Гукеш билан куч синашади.
Мукофот жамғармаси 200 минг АҚШ долларидан иборат “Grand Chess Tour” тизимидаги “SuperUnited Rapid & Blitz Croatia 2026” мусобақасининг кеча ўтказилган 4-турида Абдусатторов қора доналарда Максим Вашье-Лаграв билан муроса йўлини танлади. 5-турда эса оқ доналарда Рамешбабу Праггнанандхани мағлуб этди. 6-турда қора доналарда Жордан Ван Форест билан дуранг ўйнади.
Бугун рапид йўналишида ўтадиган сўнгги 7-9-тур ўйинлари остонасида франциялик Алиреза Фирузджа 10 очко билан пешқадамлик қилмоқда. Кейинги ўринларда ҳаракатланаётган 5 нафар шахматчи 7 очкога эга бўлиб турибди.
Нодирбек Абдусатторов 6 та тур якунларига кўра, 6 очко билан қўшимча кўрсаткичлар эвазига 6-ўринни банд этган.
Бугун ўтадиган 7-турда Нодирбек оқ доналарда Гукеш, 8-турда ҳам оқ доналарда Алиреза Фирузжа ва 9-турда қора доналарда хорватиялик Иван Сарич қаршилигини енгиши лозим бўлади.
Эслатиб ўтамиз, бугун рапид йўналишида ғолиб ва совриндорлар аниқланса, 4-5 июль кунлари 10 нафар дунёнинг энг маҳоратли гроссмейстерлари қатнашаётган турнирнинг 18 та турдан иборат блиц баҳслари ташкил этилади.
Т. Рўзиев, ЎзА
