“WORLD EDU - 2026” халқаро таълим кўргазмаси ўтказилди
Самарқанддаги SOF EXPO кўргазма майдонида “WORLD EDU – 2026” халқаро таълим кўргазмаси бўлиб ўтди. Кўргазмада Россия, Беларусь, Қозоғистон, Туркия ва бошқа ўндан ортиқ мамлакатдан етакчи университетлар, таълим ташкилотлари, консалтинг компаниялари ва ўқув марказлари иштирок этди.
– Ташриф буюрувчилар сони аввалги йилларга нисбатан сезиларли даражада ошди. Кўргазмада фақат биринчи куннинг ўзида 2600 дан ортиқ киши иштирок этди, – дейди SOF EXPO кўргазма мажмуаси директори Аҳмад Тожибоев. – Умуман олганда, тадбир 5000 дан ортиқ кишини жалб қилган бўлса, ўтган йили 4000 дан ортиқ киши келган эди. Ҳар йили WORLD EDU оддий кўргазмадан тажриба алмашиш, таълим имкониятларини тақдим этиш ва янги ҳамкорликни шакллантириш учун самарали платформага айланиб бораётганидан мамнунман.
“WORLD EDU – 2026” абитуриентлар, талабалар ва уларнинг ота-оналари учун асосий платформадир. У орқали халқаро ва маҳаллий университетларга кириш, таълим грантлари ва стипендиялари, халқаро имтиҳонлар (IELTS, SAT, GMAT), замонавий таълим дастурлари ва мартаба истиқболлари бўйича энг сўнгги маълумотларга эга бўлиш имконини беради.
Ташриф буюрувчилар университетлар вакиллари билан бевосита мулоқот қилиб, маслаҳатлар олишди, тақдимотлар ва касбга йўналтириш сессияларида иштирок этиш имкониятига эга бўлди.
Кўргазмада Самарқанддаги олий таълим муассасалари ҳам ўзини намоён этди. Масалан, Самарқанд давлат архитектура-қурилиш университети абитуриентларга шаҳарсозлик ва кадастр геодезияси бўйича амалий вазифаларни бажаришда ўзларини синаб кўриш имкониятини берди. Ушбу формат ёшларга нафақат касб ҳақида билиб олиш, балки уни том маънода ҳис қилиш имконини берди.
“WORLD EDU - 2026” нафақат таълим танлови платформаси, балки минтақада инсон капиталини ривожлантиришнинг муҳим воситасига айланиб бораётгани таъкидланди.
Ғ. Ҳасанов, А. Исроилов (сурат), ЎзА
