"World Boxing" янгиланган рейтингида ўзбек боксчиларининг ўрни қандай?
"World Boxing" элита тоифасидаги эркаклар ва аёллар ўртасидаги янгиланган жаҳон рейтингини эълон қилди. Унда ўзбекистонлик боксчилар бир қатор вазн тоифаларида пешқадамлар сафидан жой олди.
Жумладан, эркаклар ўртасидаги рейтингда беш нафар вакилимиз ўз вазн тоифасида биринчи ўринни эгаллади. Жумладан, Абдумалик Халоков (-60 кг), Асадхўжа Мўйдинхўжаев (-65 кг), Жавоҳир Умматалиев (-80 кг), Акмалжон Исроилов (-85 кг) ҳамда Тўрабек Ҳабибуллаев (-90 кг) ўз вазнларида дунёнинг энг кучли боксчилари сифатида қайд этилди.
Фазлиддин Эркинбоев (-75 кг) учинчи, Жасурбек Йўлдошев (-85 кг) бешинчи, Ҳалимжон Мамасолиев (-90 кг) олтинчи поғонани эгаллаган.
Еттинчи ўринда Абдуллоҳ Мадаминов (-65 кг) ва Жавоҳир Абдураҳимов (-75 кг), тўққизинчи поғонада Шавкатжон Болтаев (-70 кг) қайд этилган. Асилбек Жалилов (-50 кг) 13-ўрин, Миразизбек Мирзахалилов (-55 кг) 15-ўрин, Самандар Олимов (-55 кг) 19- ўрин, Шодиёржон Мелиқўзиев (-50 кг) 20-ўрин, Шаҳзод Музаффаров (-55 кг) 22-ўриндан жой олган.
Бошқа вазн тоифаларида Абдураҳмон Маҳмуджонов (-60 кг) 17-ўрин, Дилшод Абдумуродов (-60 кг) 34-ўрин, Мадияр Данияров (-60 кг) 40-ўрин, Адҳамжон Муҳиддинов (-65 кг) 31-ўрин, Муҳаммадазизбек Исмоилов (-70 кг) 34-поғонани эгаллаган. Шунингдек, Тўрабек Ҳабибуллаев (-80 кг) 23-ўрин, Нусратбек Тоҳиров (-90 кг) 21-ўринда қайд этилган. +90 килограмм вазн тоифасида Арман Маханов ва Ҳалимжон Мамасолиев 22-ўринни бўлишиб турибди.
Аёллар ўртасида Навбаҳор Ҳамидова (-65 кг) учинчи ўринни эгаллаган. Сабина Бобокулова (-48 кг) ва Олтиной Сотимбоева (+80 кг) олтинчи, Феруза Казакова (-51 кг), Азиза Зокирова (-70 кг ва -75 кг) ҳамда Рухшона Парпиева (-80 кг) еттинчи поғонадан жой олган.
Фарзона Фозилова (-48 кг) ва Ситора Турдибекова (-60 кг) 11-ўрин, Нигина Ўктамова (-57 кг) ҳамда Ойша Тоирова (-70 кг) 12-ўринда қайд этилган.
Шунингдек, Феруза Абдуалимова (-65 кг) ва Соҳиба Рўзметова (-80 кг) 23-ўрин, Муштарийбону Иброҳимжонова (-60 кг) 26-ўриндан жой олган. Феруза Казакова (-54 кг) эса 35-поғонада қайд этилган.
Маълумот учун, “World Boxing” томонидан 11 ноябрь куни эълон қилинган мазкур рейтинг 2024 йил ноябридан 2026 йил октябригача бўлган мусобақалар натижаларини қамраб олган. Унда Олимпия ўйинлари, жаҳон чемпионатлари, “World Boxing” кубоклари ва “Challenge” мусобақалари, қитъа чемпионатлари, қитъавий кўп спорт тури мусобақалари ҳамда “World Boxing” кубоги финалларидаги натижалар учун очколар ҳисобланган.
Эслатиб ўтамиз, 26 ноябрь — 4 декабрь кунлари Тошкент шаҳрида “World Boxing 2026” жаҳон кубогининг финал босқичи бўлиб ўтади. Мазкур мусобақада эркаклар ва аёллар ўртасидаги беллашувлар ташкил этилади.
Жавоҳир Тошхўжаев,
ЎзА
