Вашингтон ва Теҳрон кескинликка чек қўйди: Женевада тинчлик шартномаси имзоланади
Покистон Бош вазири АҚШ ва Эрон ўртасида тарихий тинчлик битими тузилганини эълон қилди. Минтақада кўп йиллик ҳарбий кескинликка чек қўйилиб, янги давр бошланиши мумкин.
Шаҳбоз Шариф баёнотига кўра, томонлар барча йўналиш, жумладан Ливан ҳудудида ҳам ҳарбий ҳаракатни зудлик билан ва узил-кесил тўхтатишга келишган. Ушбу ҳужжатни расмий имзолаш маросими 19 июнь куни Швейцариянинг Женева шаҳрида бўлиб ўтади. Тинчлик музокарасида воситачилик қилган Покистон низо томонлари, шунингдек жараёнда яқиндан кўмаклашган Қатар, Саудия Арабистони ва Туркия давлатларига миннатдорлик билдирди.
Президент Дональд Трамп ҳам ижтимоий тармоқдаги шахсий саҳифасида Эрон билан келишув якунланганини ёзган. Оқ уй раҳбари Ҳурмуз бўғозини ҳеч қандай бож ва чекловсиз очиш ҳамда АҚШ ҳарбий-денгиз кучлари томонидан ўрнатилган денгиз қамалини дарҳол бекор қилиш бўйича кўрсатма берганини таъкидлади. Хорижий кемаларни нефть ташишда давом этишга чақирар экан, Трамп кейинчалик журналистларга берган изоҳида бўғоз Эрон билан келишув расмий имзолангандан кейин тўлиқ очилишини қўшимча қилди.
Эрон ташқи ишлар вазири ўринбосари Козим Ғарибободий ҳам давлат телевидениеси орқали чиқиш қилиб, Вашингтон билан келишилган ҳужжат матни тайёрлигини тасдиқлади. Ушбу дастлабки келишувдан сўнг 60 кун давомида якуний тинчлик шартномасини ишлаб чиқиш бўйича музокара олиб борилади ва бу даврда Ислом Республикаси меморандум шарти бажарилишини қатъий назорат қилади. Ўз навбатида, вице-президент Жей Ди Вэнс Женевадаги тадбирда иштирок этишни режалаштираётгани, анжуманга Президент Дональд Трампнинг шахсан ўзи бориши ҳам мумкинлигини маълум қилди.
Ф.Яхшибоева, ЎзА
