11 август кечаси Тошкент туманидаги «Уч қаҳрамон» бозорида катта ёнғин содир бўлди. Соат 02:22 да Тошкент вилояти ФВБга "Уч қаҳрамон" бозори ёнаётгани ҳақида хабар келиб тушганидан сўнг ёнғин-қутқарув экипажлари воқеа жойига соат 02:29 да етиб борган ва жами 10 та ёнғин-қутқарув экипажи оловни ўчиришга жалб этилган.

Ёнғин соат 4:46 да бартараф этилган. ФВВ берган хабарларга кўра тан жароҳати олганлар тўғрисида маълумот келиб тушмаган.  

 Ёнғин содир бўлган жойларни кўздан кечирар эканмиз хунук бир манзара гавдаланади. Бир тарафда қайғуга ботган одамларнинг ғамгин нигоҳи, иккинчи тарафда бирор-бир буюми омон қолганидан умидвор тадбиркорларнинг ўз маҳсулотларини саралаётгани, ёнғин хавфсизлиги ходимларининг ўрганишлари, хуллас барчаси ачинарли. Юзлаб инсонларнинг дўконлари ва ичидаги буюмлари кулга, вайронага айланган.  

Бундай йирик ёнғиннинг сабаби нимада ва айбдор ким?  

Авваламбор, бозор учун жой яхши танлангани туфайли ва бу ерда одам доимо гавжум, савдо жадал ривожланаётган эди. Ёнғин ўчоқларини кузатар эканмиз, бир қарашда бозор қурилишида кўплаб камчиликларга йўл қўйилганлиги аён бўлади.  Дўконлар ўртасидаги тўсиқлар аслида девор бўлиши керак эди, ёнғинга қарши ҳимояланмагани, тез ёниш хусусиятига эга бўлган товарлар билан тўлдирилганлиги туфайли аланга бир зумда бутун бозорни қамраб олди.  

Мўъжизами ёки  ёнғин хавфсизлиги таъминланганиданми, бир дўконни аланга айланиб ўтибди. Омон қолган дўконнинг эгаси кимлиги аниқлай олмадик, лекин қолган барча дўконлар кулга айланибди. Ҳозирда соҳа мутахассислари томонидан ёнғин сабабларини ўрганиш, зарар миқдорини аниқлаш ишлари давом этмоқда.

<iframe width="640" height="420" src="https://www.youtube.com/embed/hoXOOZ96wss" title="“Uch qahramon” bozoridagi katta yong‘inning sababi nimada?" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Санжар Тошпўлатов, Нишонбой Абдувойитов (видео), ЎзА